O PSOE insta ao Concello a tomar medidas contra a "herba da Pampa"
Por Redacción
Os "plumachos", o nome común co que se coñece á planta invasora denominada "herba da Pampa" están a converterse, segundo os socialistas, nun "verdadeiro problema ecolóxico". En Pontevedra, especialmente nas marxes do río Gafos. Por iso, o PSdeG-PSOE insta o goberno a tomar medidas para frear o seu avance.
"Todas as administracións deben adoptar unha postura moito máis combativa contra unha situación que vai camiño de ser unha praga", denuncia o portavoz socialista, Agustín Fernández.
A pesar da ameaza que supón para a biodiversidade pola súa facilidade de reprodución, Fernández entende que ningunha administración está a facer nada por combater a súa presenza "con seriedade".
Así, os socialistas propoñen que o Concello actúe "de inmediato" sobre os espazos públicos municipais para liberalos da presenza desta planta invasora, especialmente nos lugares de maior valor natural como as ribeiras dos ríos ou a Xunqueira de Alba.
Ademais, piden que o alcalde inste ás demais administracións para facer unha "fronte común" e traballar de forma coordinada para eliminar esta planta.
No ámbito privado, os socialistas propoñen tamén a posta en marcha dunha campaña informativa para que os propietarios comprender a necesidade de evitar a proliferación desta planta e facilitarlles información sobre como erradicala.
O portavoz do PSdeG-PSOE reprocha, en todo caso, ao goberno municipal a súa inacción ante este problema, ao demostrar actuacións "absolutamente nulas" ante este tipo de cuestións ambientais.
Relacionadas:
-
A invasora herba da Pampa espállase polos terreos arredor da avenida 12 de novembro
Por Redacción |
-
A Xunta porá en marcha unha campaña de loita contra o plumacho da Pampa e a unlla de gato
Por Oskar Viéitez |
-
Vaipolorío comeza a guerra contra os "Plumachos" invasores
Por Redacción |
-
Vaipolorío busca voluntarios para eliminar os "plumachos" do río Gafos
Por Redacción |
-
Comezan os traballos para retirar a flora invasora na Xunqueira de Alba
Por Redacción |