As construtoras rebaixan ata un 24% o prezo de licitación da reforma de Luís Rocafort
Por Redacción
As ofertas das construtoras que aspiran a realizar a mellora da avenida de Luís Rocafort en Sanxenxo rebaixan entre un 24% e un 5% o prezo inicial de licitación. Así o coñeceu este mércores a mesa de contratación da Deputación, que abriu os sobres coas propostas económicas das 18 empresas que quedaban en liza para executar a obra.
A oferta máis económica foi de 1.242.196,35 euros e a máis alta de 1.568.220,5 euros sobre unha base de 1.650.759.28 euros orzamentados inicialmente polos técnicos provinciais.
Con estes datos garantiuse que ningunha das firmas aspirantes presentara unha baixa temeraria. O seguinte paso administrativo antes da adxudicación final serán a redacción dun informe de avaliación conxunta das ofertas técnicas e económicas para propoñer á Xunta de Goberno a alternativa máis favorable. Despois a empresa terá que presentar as garantías de solvencia, asinar o contrato e presentar a acta de replantexo dos traballos.
Preguntado sobre a obra de mellora da avenida Luís Rocafort, o vicepresidente Mosquera asegurou que a resolución da mesa de contratación é un trámite administrativo que é fundamental facer ben co que non debe haber présa. "Igual queres apurar -na burocracia- e de repente engánaste nun detalle, preséntanche unha reclamación, e perdes seis meses… Por iso é prioritario que se faga ben. Está todo en marcha e o fundamental é que esa obra vai levar unha calidade como se merece a zona", subliñou.
En relación aos prazos de inicio e execución, así, insistiu en que "non hai maneira de facer predicións" xa que todo depende do prazo no que finalicen os mencionados trámites burocráticos. De feito, indicou que só cando estea adxudicada a obra poderase falar das posibilidades tanto coa empresa e co Concello de Sanxenxo.
"Se non está para o verán, empézase despois do verán ou cando sexa… Obviamente as obras teñen as súas molestias. Gustaríannos que estivesen feitas antes de empezar… pero non. Hai que esgotar todos os trámites. O de hoxe é un trámite moi importante e unha vez estea a obra adxudicada será cando se poida xogar cos prazos. Antes é absurdo", subliñou.
Relacionadas:
-
As obras de Luís Rocafort comezarán o 1 de marzo e interromperanse no verán
Por Oskar Viéitez |
-
Nexia-Ors proposta para reformar a avenida Luis Rocafort en Sanxenxo
Por Redacción |
-
A mesa de contratación coñecerá este mércores as ofertas económicas para realizar as obras de Luis Rocafort
Por Redacción |
-
21 empresas optan a realizar as obras de Luis Rocafort
Por Redacción |
-
A avenida Luis Rocafort de Sanxenxo estará reformada en 2017
Por Redacción |