Rías Baixas "coloniza" sete novos países, entre eles, Vietnam, Tailandia ou Kazaxistán
Por Alejandro Espiño
Os viños da D.O. Rías Baixas chegan xa a 57 países de todo o mundo. Son uns resultados "magníficos", segundo o presidente do Consello Regulador, Juan Gil de Araujo. E é que as exportacións incrementaron en máis do 17 por cento en volume e máis dun 16 por cento en valor durante o exercicio 2012. Uns datos que se traducen nunhas vendas de case cinco millóns de litros e un movemento económico que supera os 26 millóns de euros.
As vendas ao exterior xa supoñen o 26,5 por cento do total de viño cualificado, cifras que Juan Gil de Araujo achacó a que "son la recompensa al trabajo de un sector que desde el principio tuvo claro dónde debería volcar sus esfuerzos por crecer". En total, 88 das 185 adegas da D.O. Rías Baixas están presentes en países estranxeiros, algúns deles tan afastados como Australia, Nova Celandia, ou Xapón.
"Estamos en los cinco continentes, pero nuestro objetivo es consolidarnos y crecer. Y para ello contamos con un completo y ambicioso programa de promoción y que espero que nos permita seguir creciendo fuera y dentro de nuestro país", explicou o presidente do Consello Regulador. "No podemos quedarnos saboreando las mieles del éxito". Por iso é polo que programaran un intensivo plan de promoción internacional.
Segundo explicou o gerente da D.O. Rías Baixas, Ramón Huidobro, Estados Unidos segue acaparando máis do 50 por cento das vendas internacionais con máis de 2,5 millóns de litros e un movemento económico superior aos 12 millóns de euros. Séguelle o Reino Unido, principal cliente no continente europeo con 537.604 litros, traducido en euros, 2,6 millóns. Completan o ranking dos dez principais destinos: Alemaña, Porto Rico, Holanda, México, Suiza, Irlanda, Noruega e Bélxica.
Pero Huidobro celebrou o crecemento que o viño albariño experimentou en 2012 no mercado asiático, onde supera xa a barreira dos 100.000 litros, especialmente en Xapón. Máis aló diso, destacou a entrada de Rías Baixas en países tan diferentes como Corea do Sur, Israel, as illas Bermudas, Vietnam, Tailandia, Ecuador ou Kazaxistán, aínda que recoñeceu que "queda mucho más mercado por explorar".
En todo caso, Huidobro adiantou que se levarán a cabo acciones promocionais para consolidar o mercado exterior, entre as que destacou misións inversas, catas selectivas ou a presenza de Rías Baixas en feiras internacionais. "Tenemos mucho que mostrar y creemos, por ejemplo, que trayendo aquí a los prescriptores valoren más el producto y ese plus de precios que debemos tener", concluíu.