O PP cre que o entroido de Poio "está a morrer lentamente"
Por Redacción
O Partido Popular presentará unha proposta ao goberno local de Poio para trasladar o desfile do entroido ao sábado posterior ao que se ven celebrando habitualmente.
Así o comunicou a concelleira popular Nati Torres, que levará este cambio á comisión municipal de Cultura deste mércores, xunto á dotación de tres premios a comparsas "para intentar atraer a grupos de animación de fóra e revitalizar o noso Entroido".
Torres lamentou que o Entroido poiense "está a morrer lentamente", en parte pola coincidencia de datas con outras celebracións, como Marín, e criticou a falta de innovación e ideas do bipartito: "pásanos o mesmo que coa cabalgata de Reis. Non se pode facer o mesmo durante más de 20 anos, sen intentar renovar ou mellorar as cousas, porque a xente cansa e marcha a outros concellos".
Torres recordou que a última modificación ao entroido foi precisamente a instauración dun premio ós grupos de animación a proposta do PP, e lamentou a "desgana do goberno local" por dinamizar esta tradición: "Mentres outros concellos van a máis ou polo menos innovan, o bipartito está deixando morrer o noso Entroido".
Torres apuntou que na edición deste ano o premio para as comparsas de 1.000 euros "que non é pouco", quedou deserto, e só se presentou unha parella infantil: "O desfile de Poio estase a quedar sen participantes e sen público que o mire. Chegou o momento de facer algo".
"Hai que dar alicientes á xente para que participe. Hai que renovarse e non continuar coas ideas de hai 20 anos", explicou Torres, que dixo confiar en que a comisión valorará este traslado: "é unha proposta constructiva e para mellorar e dinamizar as nosas tradicións".
Relacionadas:
-
O Galo Fodorico despide mes e pico de Entroido en Poio
Por Diego Torrado |
-
A chuvia obriga a buscar novas datas nos entroidos de Poio e Sanxenxo
Por Redacción |
-
Bota a andar un mes de Entroido en Poio. Consulta os gañadores do desfile
Por Diego Torrado |
-
Poio prepárase para un mes de Entroido con catro enterros e un gran desfile
Por Anxo Lourido |