Poio retoma o Entroido, despois do mal tempo, cunha gran variedade de actividades
Grazas á chegada do bo tempo, recupéranse as actividades do Entroido no municipio pontevedrés de Poio. Tras a cancelación do Enterro do Mexillón debido a chuvia, o 2 de Marzo realizábase unha reunión cos representantes das Comparsas Os Canecos, Os Centolos e do Grupo "Entroido de Samieira" para poder fixar un novo día para materializar a marcha.
A data pactada para que os veciños de Poio poidan gozar da comitiva é o 19 de Marzo, manténdose o traxecto previsto inicialmente e saíndo ás 18 horas da Rúa Maceira ata a Praza de Chousa, onde se procederá a queimar o molusco.
Calquera persoa que se achegue ao municipio poderá gozar do resto da programación, que non sufriu variacións, con actividades destinadas a todos os públicos. O 11 de Marzo terá lugar o Enterro do Berberecho a partir das 19:30, con premios para os mellores disfraces. Unha semana despois, desde as 20:30 vai desenvolverse o Enterro do Galo Bruxo, xunto coa Festa da Filloa. O Entroido de Poio concluirá o 25 de Marzo co Enterro do Galo Fodorico, a partir das 20.00 horas acompañada da VI Festa do Choqueiro.
OUTRAS PROPOSTAS CULTURAIS
Pero non todo son disfraces e desfiles, a Concellería de Cultura e Festexos incorporou no calendario multitude de actividades para poder satisfacer os gustos de todas as persoas que se acheguen a esta festa tan característica.
Este domingo 12 de marzo estarán en Poio Monicreques e Contacontos "Tarabelos" que presentan "A que cheiran os contos". Conxugando títeres xigantes e sombras chinesas entusiasmarán as necesidades de lecer dos máis pequenos. Máis tarde, a partir das 17:30, seguirán na Antiga Escola do Sartal coa lectura de contos clásicos infantís.
Porta Aberta a través de Poio Escena o 17 de Marzo en Combarro presentará unha comedia de enredo ás 21.00 horas. Tamén será o último día para poder inscribirse no III Concurso de Monólogos que de vai ter lugar entre o 24 e 31 de Marzo, os interesados poden acceder ás bases en concellopoio.gal.
Por outra banda, producirase unha homenaxe emotiva e imprescindible a favor das mulleres silenciadas na historia galega recente, a través de "Un cesto de mazás". Trátase do segundo título da escritora Montse Fajardo que o presentará en Poio o próximo 23 de Marzo ás 20:15. Este acontecemento terá a presenza de Luís Bará e da concelleira de Cultura e Festexos de Poio, Lida Salgueiro.
Relacionadas:
-
O Galo Fodorico despide mes e pico de Entroido en Poio
Por Diego Torrado |
-
E alá se foi tamén o Mexillón de Combarro. O Entroido de Poio entra na recta final
Por Diego Torrado |
-
Continúa en Samieira a rolda de despedidas e enterros do Entroido de Poio
Por Diego Torrado |
-
Lourido enterra ao seu berberecho e Poio empeza a despedir o entroido
Por Diego Espiño |
-
A chuvia obriga a buscar novas datas nos entroidos de Poio e Sanxenxo
Por Redacción |
-
Poio prepárase para un mes de Entroido con catro enterros e un gran desfile
Por Anxo Lourido |