Lores sobre o complexo deportivo da Parda: "gustaríame que estea rematado en 2019"
Por Diego Espiño
O alcalde de Pontevedra, Miguel Anxo Fernández Lores, e a concelleira de Deportes, Anxos Riveiro, mantiveron este venres unha reunión en Santiago coa Secretaria xeral para o Deporte, Marta Míguez, para falar sobre o proxecto de construción do centro lúdico-deportivo da Parda e na que Pontevedra solicitou á Xunta que colabore economicamente co ITU Multisport Festival de tríatlon de 2019.
Lores recoñeceu con respecto á Parda, onde está previsto construír un novo pavillón deportivo e un anexo para ximnasia, que "gustaríame que estea rematado no ano 2019".
Para iso está calculado poder adxudicar partidas á obra nas anualidades de "2018-2019 e este ano xa se é posible facer algo na urbanización da parcela", sinalou o rexedor.
Será un investimento importante na que se pretende que a Xunta de Galicia colabore achegando o 50% do custo do pavillón principal, o que situaría a súa achega "arredor dos dous millóns de euros".
Polo momento a intención é asinar un protocolo de colaboración coa administración autonómica que se verá referendado co convenio definitivo unha vez deseñado o proxecto e concretado o seu orzamento final.
COLABORACIÓN NO MULTISPORT FESTIVAL DE TRÍATLON
Outro dos asuntos tratados no encontro coa Secretaria Xeral para ou Deporte foi a organización do ITU Multisport Festival de tríatlon que terá lugar en Pontevedra en 2019, o que supoñerá que se celebren na cidade ata catro campionatos do mundo en apenas 10 días.
"Nun evento destas características, aínda que permitan o uso do CGTD, a Xunta ten que estar no comité de honra e facer unha importante colaboración", explicou Lores, que trasladou a petición para que a administración autonómica comparta parte dos gastos de organización dun evento do que, defende, se beneficiará toda Galicia.
O comité organizador do Multisport Festival de tríatlon constituirase "nun par de meses", sinalou Anxos Riveiro, e tomará como referencia a primeira edición do evento, prevista para o próximo verán en Canadá, para elaborar un orzamento e empezar a organizar a súa insfraestructura.
Relacionadas:
-
Acordo para expropiar unha parcela para os accesos ao futuro pavillón da Parda
Por Anxo Lourido & Mónica Patxot |
-
O Concello buscará alternativas para os ximnastas á espera do novo pavillón da Parda
Por Manu Otero |
-
Adquiren tres parcelas para o acceso ao futuro centro deportivo da Parda
Por Alejandro Espiño |
-
Problemas de espazo condicionan o uso do CGTD por parte de Cisne, Arxil e Voleibol Pontevedra
Por Diego Espiño |
-
Un quinto campionato do Mundo completará o cartel do ITU Multisport Festival de tríatlon en 2019
Por Diego Espiño |
-
O complexo da Parda promete ser, segundo o Concello, unha "revolución" deportiva e arquitectónica
Por Alejandro Espiño |
-
Feijóo compromete a variante de Alba, un pavillón de ximnasia e unha nova residencia
Por Alejandro Espiño & Cristina Saiz |
-
A imaxe do ITU Multisport Festival 2019, de estrea en Avilés
Por Redacción |
-
Pontevedra será en 2019 a capital mundial do tríatlon
Por Diego Espiño |