A multitude réndese ao paso das sete confrarías da Semana Santa pontevedresa
Por Diego Torrado
A procesión dos Pasos é, cada ano, a máis multitudinaria da Semana Santa de Pontevedra. E este 2017 non defraudou. Unha multitude saíu á rúa este Xoves Santo para presenciar a espectacularidade que lle dá ser a única das citas relixiosas destes días que congrega ás sete confrarías da cidade e a mil confrades procesionando á vez.
Os pasos da Última Cea (Cofradía del Mayor Dolor), a Oración de Jesús no Horto (Cofradía de Nuestra Señora del Amor Hermoso), Jesús Cativo e paso da Flaxelación de Jesús (Cofradía del Silencio), Jesús atado á columna (Cofradía del Cuerpo Santo), Ecce Homo (Cofradía del Espíritu Santo), Cristo coa Cruz ao lombo (Cofradía de Nuestro Padre Jesús con la Cruz a cuestas) e Santísimo Cristo da expiración e Virxe da Soidade (Cofradía de la Vera-Cruz y Misericordia) percorreron a contorna de Santa María e o centro histórico deixando ao seu paso o silencio e o profundo respecto dos devotos pontevedreses.
Con esta procesión abriuse o Triduo Pascual, o período que ata a madrugada do domingo conmemorará a paixón, morte e resurrección de Cristo, ao grande e agora deixa o paso á xornada con máis actividade de toda a semana, un Venres Santo no que os actos principais serán as procesións do Encontro con Vía Crucis Penitencial e do Santo Enterro.
Ás 9.00 horas deste venres sairá o paso da Virxe da Soidade da igrexa de San Bartolomé e o paso de Cristo coa Cruz ao Lombo da basílica de Santa María, para atoparse na praza do Teucro. Tras ese encontro na cuarta estación do Vía Crucis, cada paso regresará á súa igrexa de orixe, levados por homes e mulleres, respectivamente. É a procesión do Encontro con Via Crucis Penitencial e organízana a Cofradía de la Vera-Cruz y Misericordia e a Cofradía de Nuestro Padre Jesús con la Cruz a cuestas.
Xa pola tarde, a atención centrarase a partir das 20.00 horas na basílica de Santa María coa procesión Xeral do Santo Enterro, que realizará o percorrido habitual pola praza España, Riestra, Oliva, García Camba, Peregrina, Soportais, Manuel Quiroga, Don Filiberto, Alhóndiga para concluír, de novo, na avenida de Santa Maria.
Relacionadas:
-
A Semana Santa de Pontevedra baixa o pano coa procesión do Resucitado
Por Redacción & Diego Torrado |
-
A Semana Santa pontevedresa entra na súa recta final tras a procesión do 'Santo Enterro'
Por Redacción & Diego Torrado |
-
A procesión do Encontro anima a mañá do Venres Santo en Pontevedra
Por Redacción & Diego Torrado |
-
RADIO.- Canto custan e canto reportan as procesións de Semana Santa?
Por Marisa Ciordia |
-
A Cofradía del Mayor Dolor enche as rúas coa procesión máis feminina da Semana Santa
Por Diego Torrado |
-
O Xesús Nazareno cumpre coa tradición do Martes Santo
Por Redacción & Diego Torrado |
-
O Cristo das Caídas volve percorrer a Boa Vila o Luns Santo
Por Redacción & Diego Torrado |
-
Milleiros de palmas e ramos reciben á 'Borriquita' en Pontevedra
Por Alejandro Espiño |