En Marea reclama no Parlamento a recuperación da Carabuxeira e o PP responsabiliza ao Concello
Por Oskar Viéitez
O deputado de En Marea por Pontevedra Marcos Cal defendeu este mércores na Comisión de Medio Ambiente do Parlamento de Galicia unha iniciativa que insta á Xunta a iniciar os trámites necesarios para a recuperación da praia da Carabuxeira e o seu entorno, á reparación das vivendas afectadas e a devolución desa parte do litoral ao seu estado anterior á construción do porto deportivo de Sanxenxo.
En Marea denunciou o cambio na dirección das correntes mariñas producidas polo novo dique, que transformaron nun pedregal a praia da Carabuxeira, "afectando non só ao disfrute dos areais se non tamén aos muros, cimentacións das vivendas, instalación e acceso á praia".
Pola súa banda o voceiro de Medio Ambiente do grupo popular, Gonzalo Trenor, lembrou no Parlamento que o Concello de Sanxenxo é o responsable de levar adiante as medidas reparadoras sobre a praia da Carabuxeira, "tal e como se recolle nas resolucións ditadas pola xustiza".
Trenor indicou que "Portos de Galicia limítase a actuar na praia de Carabuxeira seguindo estes ditames xudiciais, que poñen de manifesto que este ente público non é a administración legalmente competente para proxectar nin executar as medidas correctoras que se requiren".
En resposta ao PP, Marcos Cal defendeu que "é a Xunta a que xerou o problema autorizando unha obra deste calibre sen ter en conta os seus efectos sobre as vivendas e a contorna natural".
Na réplica o deputado popular dí que "o Concello de Sanxenxo, como titular da empresa Nauta, é quen ten que executar estas medidas correctoras na praia de Carabuxeira, unha vez que asumiu todas as responsabilidades atribuídas no seu momento á concesionaria, así como as derivadas da súa actuación", subliñou.
En Marea aceptou a emenda do Partido Socialista que propoñía fixar un prazo de reparación dos danos, establecendo como límite o primeiro semestre de 2018, pero a iniciativa foi rexeitada cos votos en contra do Partido Popular.
Relacionadas:
-
Sanxenxo aposta por un proxecto para a praia da Carabuxeira que inclúa unha senda peonil
Por Redacción |
-
Sanxenxo quere negociar con Costas o depósito de area en Carabuxeira
Por Oskar Viéitez |
-
Reclaman solucións para mellorar o estado actual da praia da Carabuxeira
Por Redacción |
-
Sanxenxo ve "intolerable" que Portos priorice o dique de Portonovo á rexeneración da Carabuxeira
Por Redacción |
-
Nauta insta a Costas a executar a rexeneración da Carabuxeira
Por Redacción |