Os comerciantes piden que as terrazas dos bares non resten visibilidade aos seus negocios
Por Redacción
O goberno municipal segue coa súa xeira de contactos para avanzar na nova ordenanza que regulará a actividade das terrazas e veladores da hostalería. Tras un primeiro contacto co sector, o Concello decidiu abrir as conversas con outros colectivos que poden estar afectados por esta actividade. Así, os seguintes en ser consultados foron os comerciantes.
A concelleira Anabel Gulías mantivo este encontro con membros do Centro Comercial Urbano Zona Monumental, Aempe, Galerías Oliva e Cámara de Comercio.
Todos eles mostraron o seu apoio a que se melloren as condicións nos que os hostaleiros poden colocar as súas terrazas no espazo público, sempre que cumpran unha serie de condicións.
Os comerciantes reclaman que a súa actividade non choque coa convivencia veciñal, que non entorpezan a carga e descarga dos establecementos e que os elementos decorativos das terrazas, especialmente as áncoras ou os toldos, non interrompan a actividade comercial, é dicir, que non reste visibilidade aos negocios.
"Son cuestións todas elas razoables", indicou a concelleira de Promoción da Cidade, Anabel Gulías, quen comparte a formulación de que os veladores e terrazas teñen que convivir co día a día da cidade.
O encontro forma parte da rolda de contactos posta en marcha polo Concello para escoitar as demandas dos distintos colectivos empresariais e sociais respecto aos veladores, recoller achegas e finalmente acadar o maior consenso posíbel na revisión e actualización da ordenanza vixente.
Para os próximos días hai previstos novos encontros.
Relacionadas:
-
Os bares poderán instalar as súas terrazas a partir das nove da mañá
Por Alejandro Espiño |
-
O Carabela perde o monopolio da terraza na Praza da Estrela
Por Oskar Viéitez |
-
Comisións Obreiras quere ser consultada polo Concello antes de redactar a ordenanza de terrazas
Por Oskar Viéitez |
-
As federacións de veciños piden que a ordenanza de terrazas garanta o descanso dos cidadáns
Por Redacción |
-
O "bo ambiente" entre sectores, clave para acelerar a ordenanza de terrazas
Por Alejandro Espiño |
-
O Concello, "predisposto" a ampliar o horario das terrazas da hostalería
Por Alejandro Espiño |
-
Os cambios na ordenanza de terrazas e veladores supoñerán un "proceso longo" de negociación
Por Diego Espiño |
-
RADIO.- Unha nova ordenanza de veladores e terrazas, co silencio xeralizado "a priori" da hostalería
Por Marisa Ciordia |