Os traballadores de Elnosa defenderán a súa continuidade "póñase quen se nos poña por diante"
Por Alejandro Espiño & Alba Sotelo
Nin a choiva, que caeu con forza durante o inicio da súa marcha, puido coa vontade dos traballadores de Elnosa de retomar as mobilizacións na rúa para defender a continuidade da empresa en Lourizán e, por tanto, o mantemento dos seus postos de traballo. Seguirano facendo, advirten, "póñase quen se nos poña por diante".
Así o asegurou o presidente do comité de empresa de Elnosa, Avelino García. Foi ás portas do Concello, onde se concentraron unhas 150 persoas para denunciar que a administración municipal "ponnos unha cantidade de trabas que noutros concellos non se están poñendo" a este tipo de industrias.
Os traballadores, en todo caso, aseguran que "nos dá igual o signo político" que teña cada administración, porque "vamos a seguir pelexando" pola súa permanencia "lle pese a quen lle pese e acúsenos do que nos acusen", algo que, entenden, "témolo moi claro".
O presidente do comité afirmou que "imos ir contra de quen creamos nós que nos prexudica", incluso a propia empresa, coa que se reunirán o vindeiro luns en Portugal e á quen esixen que presente "dunha vez" a documentación que teñen que presentar para obter a prórroga de Costas e a autorización ambiental integrada.
"Ás veces hai que dicir as cousas e tamén hai que cumprilas", lembrou Avelino García.
Ademais, o persoal de Elnosa ve á Xunta de Galicia "un pouco paralizada" e lamentan que, mentres que en Torrelavega (Cantabria) aprobouse unha moratoria de dous anos para eliminar o mercurio no proceso de produción de cloro, en Pontevedra "somos a ovella negra" e consideran que "sempre temos un trato diferente a outros sitios".
A mobilización, que partiu das instalacións de Elnosa en Lourizán e que incluíu unha parada de "cinco minutos" ante a delegación da Xunta, concluíu cun escrache "pacífico" nas inmediacións da casa particular do alcalde, en Marcón.
El tamén, segundo Avelino García, "nos ataca día tras día" e todos os anos "veñen a manifestarse diante da empresa", polo que explicou que os traballadores tamén teñen dereito a ir "respectando algo de intimidade" ata a súa casa para defender a continuidade da cloreira na súa actual localización na ría de Pontevedra.
"Somos traballadores exemplares. Non entraremos en provocacións. El si que vai a bater en ferro duro. Elnosa non se pecha", dixo o presidente do comité de empresa aos participantes neste escrache, antes de que se disolvese a concentración e os traballadores regresasen ás súas casas.
Relacionadas:
-
As familias do persoal de Elnosa van concentrarse ante o Concello o sábado 17 de xuño
Por Anxo Lourido |
-
O Bloque acusa á Xunta de manter reunións "segredas" con Elnosa para "cociñar a súa permanencia"
Por Oskar Viéitez |
-
Lores, sobre o escrache de Elnosa: "Non é a primeira vez nin será a última. Xa nos rebentaron un pleno"
Por Alejandro Espiño |
-
Escrache ao alcalde a seis meses da data límite para Elnosa en Lourizán
Por Mónica Patxot & Anxo Lourido |
-
Traballadores de Elnosa comezan a súa peregrinaxe a Compostela: "Ninguén nos vai intimidar"
Por Redacción | Creada e actualizada