Novo concurso de escaparates para presumir de tendas
Por Anxo Lourido
Ata o 9 de abril está aberto o prazo para aqueles establecementos comerciais de Pontevedra que queiran participar na nova edición do concurso de escaparates Ponte en primavera. Nesta ocasión utilízase o lema "ÿ primavera. Por fin vai sair o sol" e a temática débese centrar nesta estación do ano e o obxectivo é animar os paseantes a entrar nas tendas.
Os escaparates que participen no concurso deberán manterse entre os días 15 e 30 de abril, período no que un xurado profesional realizará as visitas para elixir os gañadores. Terase en conta para a avaliación que o produto resulte atraente para o consumidor. Segundo expuxo a concelleira de Promoción económica, Carlota Román, na presentación premiarán aqueles escaparates que non estean "charramangueiros e que reflictan coherencia na decoración, a elegancia e a iluminación".
Os premios serán de 500, 300 e 200 euros. Os interesados en inscribirse deberán encher un formulario nas sedes de AEMPE ou da Asociación Zona Monumental.
Na edición do pasado ano participaron 32 comercios e na do Nadal inscribíronse 47 establecementos e, segundo os membros do xurado, ofreceron un nivel moi elevado de decoración dos seus escaparates.