A rapazada aproveita o seu día para celebrar ao grande o remate das Festas da Peregrina
Por Cristina Saiz
Os menores volveron converterse nos grandes protagonistas deste luns posterior á Semana Grande das Festas da Peregrina e, acompañados por familiares, achegáronse a gozar do Día do Neno. Esta xornada xa habitual desde hai anos permite subir ás atraccións con descontos nos prezos de ata o 50%.
Desta forma, os pequenos puideron subirse, entre outros, aos coches de choque, aos carruseis, á nora ou ao touro mecánico e divertirse antes de que mañá comece o desmonte de todas as barracas de festa situadas na Alameda de Pontevedra.
A xornada calorosa, con temperaturas que superaban os 32 graos, non impediu que tanto a partir do mediodía como durante a tarde, os máis pequenos gozasen deste día especial.
Os menores volverán ser protagonistas das Festas de Verán este mércores coa celebración da Festa do Demo.