Astronomía a nivel usuario
Por Oskar Viéitez
Un grupo de alumnos de Marín aprenderon este martes unhas nocións básicas de navegación guiada polos astros. Foron, en concreto, os escolares dos colexios Chan do Monte e Mestre Landín, acompañados dos seus profesores.
Trátase das terceiras Xornadas de Astronomía e Navegación que está desenvolvendo a Escola Naval Militar en colaboración co Ateneo Santa Cecilia.
Os alumnos puideron presenciar un documental sobre a orixe do universo e dos planetas, e a continuación visitaron o Simulador de Navegación.
Os responsables do Ateneo Santa Cecilia, organizadores da iniciativa, destacaron a boa acollida que está tendo esta actividade entre os colexios da comarca.
Así a Escola Naval ten previsto realizar esta actividade polo menos un martes de cada mes ata finais do mes de xuño.