Traballadores de Elnosa rexeitarán no Parlamento Galego o "fanatismo" de BNG e Marea
Por Anxo Lourido
Están cansados da "merda que se está botando cara Elnosa", así se manifesta o presidente do comité de empresa da fábrica de cloro de Lourizán, Avelino García. Desta forma quería contestar as acusacións realizadas desde o Concello de Pontevedra ao indicar que o novo sistema previsto para a fábrica ía contaminar máis a ría de Pontevedra.
Avelino García indica que esa afirmación é unha falacia por parte do goberno local e alega que haberá máis vertidos pero non máis contaminación co cambio que proxecta a dirección da cloreira.
José Luis García Pedrosa, secretario de organización de Comisións Obreiras, lamentaba o "fanatismo" tanto do BNG como de En Marea en relación coa actividade industrial na ría de Pontevedra.
Por este motivo, ante o anuncio do deputado nacionalista Luís Bará de presentar este mércores 13 unha pregunta parlamentaria sobre a continuidade de Elnosa en Lourizán, os traballadores concentraranse ás portas do Parlamento de Galicia. "Hai que ser serios e non tan golfos", indicou García Pedrosa que insistía en que desde CC.OO. "non imos permitir que Elnosa peche".
O comité de empresa xa solicitou unha entrevista coa dirección para coñecer cales son os plans tendo en conta que o 11 de decembro teñen que deixar de producir cloro con mercurio e deberán cinguirse á elaboración de hipoclorito, un composto que se emprega para a limpeza de piscinas. A empresa, segundo asegura Avelino García, atópase á espera do que suceda coa revisión da Autorización Ambiental Integrada, sobre a que debe pronunciarse antes do 11 de decembro.
Tamén continúan a agardar a decisión do Ministerio de Medio Ambiente sobre a prórroga de Costas que posibilite que Elnosa mantéñase en Lourizán.
Os representantes sindicais afirman que a Unión Europea ofreceu unha moratoria a unha empresa sueca Inovyn para que continúe traballando con mercurio ata maio de 2018. Unha prórroga que o comité de empresa de Elnosa demandaba tamén para a cloreira situada en Pontevedra.
Relacionadas:
-
Elnosa fai investimentos en Lourizán para fabricar hipoclorito sódico a partir do 11 de decembro
Por Mónica Patxot & Anxo Lourido |
-
A deputada socialista Patricia Vilán pregunta que vai facer a Xunta con Elnosa
Por Redacción |
-
Rueda anuncia que está moi avanzado o proxecto de reforma da ponte da Barca
Por Redacción |
-
Bará cualifica de "pernada medio ambiental" a permanencia de Elnosa na ría máis aló de 2018
Por Oskar Viéitez |
-
O BNG cre que a continuidade de Elnosa en Pontevedra xa está "cociñada"
Por Oskar Viéitez |
-
A APDR pide á Xunta que negue a revisión da autorización ambiental solicitada por Elnosa
Por Redacción |
-
A Xunta avalía a supramunicipalidade para Elnosa pero lembra que a continuidade depende de Costas
Por Cristina Saiz & Anxo Lourido |
-
Rueda garante que se Elnosa se adapta á normativa europea contará cos permisos da Xunta
Por Cristina Saiz & Anxo Lourido |
-
O Concello de Pontevedra esixirá unha avaliación de impacto ambiental de Elnosa
Por Oskar Viéitez |
-
Marea buscará un acordo do pleno para instar á Xunta a cumprir o cese de Elnosa en decembro
Por Redacción |