Oftalmólogos de España e Portugal 'actualizarán' coñecementos en Pontevedra
Por Alejandro Espiño
Douscentos especialistas en oftalmoloxía reuniranse en Pontevedra os próximos días 20 e 21 de outubro para participar nun congreso denominado Curso do Atlántico, un evento formativo organizado pola compañía Bausch+Lomb en colaboración co servizo de Oftalmoloxía do Complexo Hospitalario de Pontevedra.
Serán dous días nos que estes profesionais actualizarán coñecementos acerca da súa especialidade e coñecerán algunhas das técnicas máis avanzadas no tratamento de glaucomas, patoloxías das retinas e cataratas ou no ámbito da cirurxía refractiva para corrixir miopía, presbicias e outros defectos de visión.
Pedro Corsino, xefe de Oftamología do CHOP, é o director deste congreso que, segundo explicou na presentación, logrou reunir no seu programa aos mellores profesionais nesta especialidade, oftalmólogos de España e Portugal "con una gran capacidad docente y con mucha experiencia clínica".
O Curso do Atlántico é, engadiu Corsino, un curso de formación "continuada" que incluirá "no solo relatorios exitosos", senón que se tratarán temas "muy modernos" e as últimas tendencias en diagnóstico e tratamento de todo tipo de patoloxías oftalmológicas.
Así, o director do curso destacou, entre outras, as presentacións sobre novas técnicas cirúrxicas para o tratamento do glaucoma, sobre experiencias de éxito no ámbito da visión artificial, que estimula ollos cegos, ou sobre os tipos de lentes máis adecuados para as persoas que teñan cataratas.
Este curso que se celebrará en Pontevedra pretende, segundo os seus organizadores, ter continuidade e destacaron que a Boa Vila é "perfecta" para un congreso destas características porque "se puede ir andando a todos los lados". Ademais, non haberá comida oficial. A idea é que os asistentes "llenemos los bares" de toda a cidade.
A directora médica de Bausch+Lomb, Saskia Aguado, destacou que con este congreso a compañía pretende dar un "salto cualitativo importante" nos recursos que se dedican á formación continuada dos profesionais médicos.
Pontevedra, concluíu, é un lugar "especial" que lles permitirá contar cun contido científico e cunha nómina de relatoras que será un "referencia" en España e Portugal.
O congreso celebrarase no Pazo da Cultura.