O novo acceso a Monte Porreiro por Os Campos afectará a 32 leiras
Por Redacción
Os concelleiros Demetrio Gómez e Alberto Oubiña reuniranse este martes con veciños da contorna de Monte Porreiro para explicarlles o proxecto do novo viario de acceso a Monte Porreiro que terá un orzamento de 1.137.280 euros e un prazo de execución de nove meses.
Os representantes do goberno local sinalaron que a Deputación xa achegou fondos do convenio asinado co Concello de Pontevedra para esta obra: 439.000 euros para expropiacións e 341.000 para a execución dos traballos, que seguirán o modelo urbano coa presenza dun mínimo de 12 lombos que eviten a circulación a altas velocidades e con dous carrís, cunha beirarrúa de 2,50 metros de ancho en tan só un dos laterais desta nova estrada. No outro se instalará unha beiravía con recollida de augas.
Segundo explicaba o concelleiro responsable da parroquia de Mourente, a vía de arredor de 700 metros seguirá o trazado da Rúa da Reguiña. Crearanse zonas de aparcadoiro e no viario interno dos Campos, nas proximidades do colexio, reducirase o tráfico unicamente para residentes.
Esta nova estrada carrexa a expropiación de 32 leiras só por un dos laterais da vía, no que non hai vivendas. A Deputación de Pontevedra será a administración que se encargue do proceso de expropiación deste novo acceso á urbanización que tamén establecerá prioridade peonil e ciclista.
Relacionadas:
-
A creación do 'núcleo de centralidade' dos Campos, en marcha
Por Manu Otero |
-
O novo acceso a Monte Porreiro, en obras antes de que remate este ano
Por Alejandro Espiño |
-
A Deputación aproba este venres as expropiacións para o novo vial de acceso a Monte Porreiro
Por Redacción |
-
Pontevedra volverá contratar 20 persoas perceptoras da Risga para traballar en obras e xardíns
Por Natalia Puga |
-
A Deputación aproba o convenio para a nova estrada de acceso a Monte Porreiro
Por Redacción |
-
Os Campos convértese en "unha entrada digna" a Monte Porreiro
Por Diego Espiño |