Catorce colexios de Pontevedra participarán no programa Recíclate con Sogama
Por Redacción
Un total de catorce colexios de primaria da provincia de Pontevedra foron seleccionados para participar no presente curso académico 2017-2018 no programa Recíclate con Sogama, que xa alcanza a súa sexta edición.
Canalizado a través do Plan Proxecta da Xunta de Galicia, o seu obxectivo é instaurar a recollida selectiva de residuos nas aulas e que os hábitos de segregación do lixo por materiais formen parte da cultura ambiental dos centros a fin de fomentar a reciclaxe na comunidade, alcanzando con isto os beneficios ambientais, económicos e sociais derivados do mesmo.
Ademais do tradicional principio dos tres erres (redución, reutilización e reciclaxe), Sogama pretende ir máis aló e introducir progresivamente nas aulas o denominado criterio multierre, principal expoñente da economía circular, contemplando así o ciclo de vida dos produtos en toda a súa amplitude.
Neste contexto, reducir, reutilizar e reciclar compleméntanse con outras accións tales como repensar, redeseñar, refabricar, reparar, redistribuír e recuperar.
O fin último é que os alumnos aprendan a producir menos refugallos e, unha vez que estes se xeren, sexan capaces de tomar conciencia do gran valor que os mesmos albergan e a súa capacidade para substituír aos cada vez máis limitados e escasos recursos naturais.
Neste marco, Sogama dotará aos centros con illas de reciclaxe, conformadas cada unha por tres colectores de 120 litros de capacidade (amarelo, azul e verde) a fin de que a comunidade educativa poida segregar os seus refugallos, á vez que proporcionará un composteiro a aqueles que conten con servizo de comedor, ademais de horta ou xardín no que utilizar o abono.
Desde o plano divulgativo, a entidade conta cun bo número de recursos para formar a profesores e alumnos como charlas impartidas por educadores especializados, presentacións, guías didácticas, carteis, folletos, vídeos, xogos físicos e xogos en liña, coa particularidade de que efectuará un seguimento pormenorizado das actividades desenvolvidas en todos os colexios para que alumnos e profesores poidan obter o máximo rendemento das mesmas.
De feito, a empresa contempla no seu modus operandi a realización de caracterizacións ou mostraxes dos contedores que conforman as illas para comprobar se a selección do lixo é a axeitada e, de non axustarse esta aos requisitos, poder realizar as correccións e axustes necesarios.
Tamén financiará visitas ao seu complexo medioambiental de Cerceda (A Coruña), onde os interesados poderán comprobar por si mesmos o funcionamento das instalacións que o integran e coñecer de preto o proceso industrial desenvolvido de cara a garantir que os residuos reciban o mellor tratamento posible.
Así mesmo, a sociedade pública prevé convocar premios cos que recoñecerá os mellores proxectos, consistindo os galardóns en vales económicos canxeables por material educativo.
Os colexios participantes serán o CEIP Doutor Suárez de Fornelos de Montes, o CEIP Plurilingüe Infante Felipe de Borbón de Salvaterra do Miño o CPI Aurelio Marcelino Rey García de Cuntis, o CPI Santa Lucía de Moraña, o CEIP Marquesa do Pazo da Mercé de As Neves, o CEIP Cabanas e o CEIP A Xunqueira I de Pontevedra, o CPR Plurilingüe Possumus de Vigo, o CEIP de Abelendo de Moaña, o CEIP de Reibón e o CEIP A Guía de Moaña, o CEP Plurilingüe de Riomaior de Vilaboa, o CPI de Cova Terreña de Baiona e o CEIP Antonio Palacios de Porriño.
Relacionadas:
-
Alumnos do CEP Riomaior de Vilaboa coñecen o xornalismo e comparten micrófono en PontevedraViva
Por Redacción |
-
Sogama instrúe en Marín cara un consumo responsable e con menos residuos
Por Redacción |
-
A compostaxe chega a 65 novos fogares de Vilaboa e Cambados a través de Sogama
Por Redacción |
-
Javier Domínguez visita en Pontevedra o trailer expositivo da campaña "Oportunidades Galicia"
Por Mónica Patxot |
-
Un colexio de Vilanova, campión do programa Recíclate con Sogama
Por Redacción |