A reforma integral do multiusos da Xunqueira farase en cinco meses
Por Alejandro Espiño
Cinco meses. É o prazo de execución que terán que cumprir as empresas que opten ao contrato para a reforma integral do multiusos da Xunqueira. Trátase dunha actuación orzada en 2.143.038 euros e que será cofinanciada entre o Concello de Pontevedra e os fondos europeos que achega a estratexia DUSI.
É o terceiro proxecto europeo que inicia o concurso de adxudicación, tras saír a contratación a semana pasada tanto a reforma do Gorgullón e a peonalización da ponte do Burgo. Neste caso saíu publicado no Diario Oficial de Galicia.
Trátase dunha actuación centrada na adecuación interior e mellora da eficiencia enerxética, pero desde o Concello asegura que excepto a estrutura do edificio vai cambiar todo o pavillón.
Entre as actuacións previstas atópase a instalación dunha nova cuberta con illante térmico, a impermeabilización do teito, o cambio da cristalería nos laterais do pavillón, unha instalación nova de electricidade, fontanería, sistemas antincendios, novas caldeiras e sistema de quecemento de auga a través de placas solares.
Ademais adaptarase a instalación para que sexa plenamente accesible, así como os seus aseos.
No orzamento inclúese tamén o cambio das dúas pistas deportivas, a mellora do equipamento e a reforma dos 18 vestiarios para equipos, os tres para árbitros e os almacéns, xa que a instalación presta servizo aos campos de fútbol da Xunqueira.
As empresas poderán tamén ofertar melloras para ter máis opcións de facerse con este suculento contrato. O Concello pediu que se inclúan, na medida do posible, a colocación de marcadores con pantallas LED, a instalación de cortinas divisorias motorizadas para separar as pistas e a dotación de equipamento deportivo para o ximnasio.
Relacionadas:
-
As pistas deportivas do Multiusos instalaranse no Recinto Feiral durante as obras de reforma do pavillón
Por Diego Espiño |
-
A reforma do Multiusos comezará "canto antes" e concluirá a finais de ano
Por Alejandro Espiño |
-
Desbloqueadas as obras do Gorgullón, Multiusos, Ponte do Burgo e o Mercado de Abastos
Por Diego Espiño |
-
Pistoletazo de saída para a reforma do mercado, o multiusos e o Gorgullón
Por Natalia Puga |
-
Case todos os proxectos financiados con fondos europeos executaranse en 2018
Por Alejandro Espiño |
-
Reforma integral e "imprescindíbel" para o Pavillón Multiusos da Xunqueira
Por Diego Espiño |