A maquinaria do PP, en marcha para as municipais
Por Redacción
Un encontro no Hotel Rías Bajas, que contou coa presenza de Ana Pastor, presidenta do Congreso dos Deputados, serviu para que o Partido Popular demostre que a súa maquinaria xa está en marcha de cara as eleccións municipais de 2019.
O PP reuniu os coordinadores de distrito da formación co obxectivo de facer balance do traballo realizado nos últimos meses e determinar as accións estratéxicas do "músculo" do partido.
"Os nosos coordinadores son unha parte importante do noso partido, cuxa labor desinteresada queremos recoñecer e agradecer novamente", sinalou o presidente da formación, Jacobo Moreira, quen destacou "o esforzo e traballo constante de todos eles".
"Queremos agradecerlles o seu apoio, a súa colaboración, pois sempre que lles solicitamos axuda amosan total e absoluta disposición", recoñeceu o presidente local, "formamos un gran equipo, no que todas as persoas participan, ofrecen a súa opinión e as súas achegas, e todas elas as temos en conta á hora de traballar por e para Pontevedra", engadiu.
O acto enmárcase na rolda de encontros que nos últimos meses vén mantendo a formación encabezada por Jacobo Moreira, a última reunión, cos responsables das parroquias, permitiu afondar nos problemas que máis preocupan aos veciños das distintas parroquias de Pontevedra e fixar propostas a presentar no Concello.
Par Moreira, o PP é o partido líder da oposición e configúrase como a alternativa de goberno no Concello de Pontevedra, "pois os demais partidos xa se retrataron como o sostén do goberno cando este está en apuros, caso por exemplo da aprobación dos orzamentos".