Catorce empresas optan a executar a reforma integral da rúa Gorgullón
Por Redacción
Catorce empresas presentaron ofertas para executar o proxecto de reforma integral da rúa Gorgullón, unha actuación valorada en 1,5 millóns de euros que busca estender o modelo urbano de Pontevedra a este barrio da cidade e poñer en valor o Camiño de Santiago, pois trátase da vía de entrada dos camiñantes da ruta xacobea.
A Mesa de Contratación do Concello de Pontevedra reuniuse este xoves para iniciar o proceso de adxudicación desta obra financiada con cargo aos Fondos Europeos de Desenvolvemento Rexional (FEDER).
Unha vez abertas as primeiras ofertas comprobaron que se presentaron a este proceso de licitación as empresas Construcciones Fechi, Coviastec, Manuel Novoa Castro, Elsamex, Xestión ambiental de contratas, PRACE - Excavaciones Manuel Rodríguez, Oresa, Explotacións medioambientais S.L., OVISA, COVSA, E.C. Casas,.Naturgalia - SYR AMG, Nexia e Ediserpo - Ogmios.
O proxecto da reforma do Gorgullón consiste en acondicionar a rúa para convertela nunha vía de uso prioritario peonil e en plataforma única. Eliminaranse os pavimentos actuais, poranse outros novos na plataforma única, renovaranse todos os servizos e instalarase novas luminarias, arborado e o mobiliario necesario.
Ademais, reducirase a circulación motora e mellorarase a accesibilidade nunha rúa bastante deteriorada e con moitos sobreanchos. En concreto, haberá un modelo de plataforma única co tránsito restrinxido á veciñanza e o comercio, sen estacionamentos como nas rúas Michelena ou Peregrina.
A actuación tamén supón invertir o sentido de circulación, que pasará a ser sur-norte e nas vías transversais Moa e Travesía Eduardo Pondal quedan en dirección a Eduardo Pondal. Tamén se peonalizará a rúa do Muíño, que salvará a pendente con escaleiras.
O Camiño de Santiago quedará sinalado cunha cor e pavimento diferenciados entre calzada e beirarrúas e luces led no chan semellantes ao centro histórico e renovarase o alumeado con farolas led e redistribuiranse os puntos de alumeado.
Aproveitarase a obra para mellorar e incorporar novos servizos e está previsto ampliar a rede de auga potable, completar o separativo de augas pluviais e fecais e instalar unha rede eléctrica nova.
Entre os elementos singulares do proxecto están crear unha pantalla vexetal con pereiras de flor -Pyrus Celleriana- para agachar as traseiras dos edificios e gañar en calidade urbana e a rúa do Muíño quedará completamente peonalizada. Para salvar a pendente, converterase nunha escalinata atravesada por unha rampla para garantir a accesibilidade.
Relacionadas:
-
EC Casas iniciará a reforma do barrio do Gorgullón antes de que finalice setembro
Por Anxo Lourido & Paula Sanmartín |
-
EC Casas, elexida para reformar O Gorgullón
Por Redacción |
-
Os procesos administrativos provocarán que a reforma das piscinas de Campolongo agarde a 2019
Por Anxo Lourido |
-
Desbloqueadas as obras do Gorgullón, Multiusos, Ponte do Burgo e o Mercado de Abastos
Por Diego Espiño |
-
"Preocupación máxima" polo atraso do Goberno en liberar os fondos europeos
Por Alejandro Espiño |
-
Pistoletazo de saída para a reforma do mercado, o multiusos e o Gorgullón
Por Natalia Puga |
-
Case todos os proxectos financiados con fondos europeos executaranse en 2018
Por Alejandro Espiño |
-
Marea propón habilitar unha vía peonil entre o Gorgullón e a Avenida de Vigo
Por Redacción |
-
A reforma do Gorgullón, Virxe do Camiño e o Burgo, prioritarias para 2017
Por Alejandro Espiño |