Carmela Silva anima os turistas a gozar da "máxica" choiva das Rías Baixas
Malia que todavía se están a producir reservas por parte de turistas que elixiron a provincia de Pontevedra como destino do período de vacacións correspondente á Semana Santa, a presidenta da Deputación, Carmela Silva, adiantou este venres as estimacións de Turismo Rías Baixas. Agárdase que a ocupación media na provincia xire ó redor do 62%, un dato "positivo", segundo sinalou. O turismo rural segue sendo unha das apostas dos visitantes que chegan a Galicia, e este ano se sitúa no 65%.
A presidenta deu unha rolda de prensa no Pazo Provincial xunto co delegado da área de Turismo, Héctor Santos. Na presentación, Silva falou duns datos "moi prudentes" debido á inestabilidade meteorolóxica que se agarda para o período vacacional, ademais da continuidade das reservas nestes días.
Tras bater un récord de ocupación e turismo en 2017, Carmela Silva agarda que as estimacións melloren cando remate a Semana Santa, como adoita ocorrer todos os anos. Os datos máis altos corresponden a Caldas, municipio que rozará o 80% de turistas durante as vacacións, e á cidade de Pontevedra, cunha previsión do 65%. Valores moi positivos tamén para a zona do Salnés, en torno ao 61% de ocupación. Un 45% é a estimación de turismo para a zona do Morrazo.
Carmela quixo tamén dar algúns datos sobre o perfil do turista que visitará as Rías Baixas. Sete de cada dez persoas que visitan a comarca o fan en familia ou en grupos de amigos, o que axuda a reforzar, tal e como destacou, a aposta que desde o Goberno Provincial se fai polo turismo en familia. A maioría das reservas corresponden ao período entre o xoves Santo e o domingo de Resurrección.
A presidenta da Deputación animou a todos os turistas e visitantes a viaxar tamén cando chove xa que, aínda que as Rías Baixas constitúen un panorama moi fermoso cando hai bo tempo, a "máxica e poética" choiva de Galicia mellora e potencia a beleza destas paisaxes, indicou Silva.
Relacionadas:
-
TurisTIC preséntase como un proxecto da Deputación para unir promoción turística e tecnoloxía
Por Redacción |
-
Semana Santa con bos resultados de ocupación, malia o mal tempo
Por Redacción |
-
Sanxenxo resiste ante o mal tempo con case un 60% de ocupación
Por Oskar Viéitez |
-
Sanxenxo reforza os servizos durante a Semana Santa
Por Redacción |
-
A promoción turística da provincia desembarca en Madrid da man de Carmela Silva e Xabier Fortes
Por Redacción |