A empresa ACEVI reformará o mercado de abastos de Pontevedra
Por Redacción
Unha empresa de Pontevedra, ACEVI, será a encargada de executar as obras de reforma do primeiro andar do mercado de abastos, que se converterá nun espazo gastronómico.
O contrato está valorado en 218.682,22 euros. A aprobación definitiva está pendente da autorización de gasto do Ministerio de Facenda ao ser unha obra incluída na relación de proxectos financiados polos fondos europeos FEDER.
ACEVI, segundo trasladou o goberno municipal tras a xuntanza da mesa de contratación, asume as melloras nas instalacións e equipamento incluídas no prego de condicións.
Quince empresas presentaran ofertas a este proxecto, co que se pretende acondicionar a planta superior para novos usos diferentes aos habituais, para ofrecer novas ofertas de produtos, mantendo a morfoloxía e distribución, mellorando a imaxe e a estética co propósito de dinamizar o mercado de abastos.
Non foi a única mesa de contratación celebrada no Concello. Tamén se reuniu a da reforma do pavillón multiusos da Xunqueira, proxecto tamén cofinanciado por Bruxelas.
As ofertas presentadas oscilaron entre os 1.740.789,82 e os 2.141.095 euros. Nove empresas concorren ao concurso: Gómez Crespo, Ramírez, UTE ACEVI-Hidromiño, Ediserpo, Abal, UTE M. Espiño-Medancli, UTE Emergis-Cruzval, Copcisa e UTE Prace-Copsesa.
Todas elas inclúen as tres melloras propostas no prego de condicións: pantallas LED deportivas, cortinas divisorias motorizadas e equipamento deportivo ximnasio.
Copcisa e Ediserpo, que presentaron as propostas máis económicas, terán que xustificar a súa oferta ao temer os técnicos que incorren en baixa temeraria. Ademais, a mesa excluíu as ofertas presentadas por Arquitania Busines SL e Construcciones Ángel Jover por incumprir o prego de condicións.
Relacionadas:
-
O groso da reforma do mercado farase durante as fins de semana
Por Alejandro Espiño |
-
Os postos do primeiro andar do Mercado van ofertarse nun réxime que permitirá testealos durante un ano
Por Redacción |
-
O espazo gastronómico do mercado estará habilitado a finais de outubro
Por Alejandro Espiño |
-
O espazo gastronómico do mercado estará vinculado co mar
Por Alejandro Espiño |
-
O "novo" mercado de Pontevedra, a pleno rendemento a principios de 2019
Por Alejandro Espiño |