En 2020 os concellos terán que compostar ou recoller os biorresiduos de xeito separado por lei
Por Redacción
En 2020, os concellos de máis de 5.000 habitantes terán que compostar ou recoller os biorresiduos de xeito separado por lei e baixo ameaza de sanción. Así o explicou este martes o vicepresidente da Deputación, César Mosquera, nunha reunión mantida con máis de 100 representantes dos concellos adheridos ao Plan Revitaliza e persoal técnico provincial para explicar os cambios inminentes na lexislación estatal de residuos.
O vicepresidente destacou que o pasado 18 de maio o Ministerio de Medio Ambiente aprobou o último borrador do anteproxecto de lei polo que se modificará a normativa actual de residuos. Este novo texto normativo incorpora unha novidade que cambiará radicalmente a xestión do lixo, xa que o colector verde de fracción resto mesturada, tal e como se coñece agora, será eliminado: os biorresiduos (restos de comida e vexetais) terán que ser compostados ou recollidos de maneira separada.
Mosquera explicou que a modificación da lei fomenta os principios de autosuficiencia e proximidade para tratar os residuos o máis cerca posible da orixe poñendo como prioritarias a compostaxe individual e comunitaria e, onde non se poida, facendo unha recollida para tratamento posterior en planta.
"Por algunha desas tres vías, compostaxe individual, comunitaria ou recollida en colector marrón e traslado a planta haberá que cubrir o 100% dos biorrresiduos dos concellos de máis de 5.000 habitantes antes de 2020. Iso vai ser así, si ou si, por normativa", advertiu.
Os prazos marcados -moito máis esixentes que os inicialmente previstos- establecen que os concellos de máis de 5.000 habitantes estarán obrigados a seguir estas directrices con prazo máximo do 31 de decembro de 2020 e os de menos habitantes en 2023. O vicepresidente apuntou, neste sentido, que aínda que o borrador non está pechado, os obxectivos temporais non van variar moito, xa que a Unión Europea puxo como data límite o 2023 na súa directiva.
Finalmente, Mosquera tamén aportou datos sobre os ritmos do Plan Revitaliza: a día de hoxe trátanse 2.400 toneladas de biorresiduos por ano, o que equivale aos residuos orgánicos dunha vila de 13.000 ou 14.000 habitantes.
Relacionadas:
-
Barro amplía o seu plan de compostaxe municipal ás vivendas
Por Redacción |
-
A Universidade de Sao Paulo quere aplicar a compostaxe no seu campus como se fai en Pontevedra
Por Oskar Viéitez & Mónica Patxot |
-
Tres millóns de euros para darlle un pulo á compostaxe no que queda de ano
Por Redacción |
-
Todos de acordo, foi un pleno innecesario
Por Oskar Viéitez & Mónica Patxot |
-
Os populares din que criticar o Plan Revitaliza non é estar en contra da compostaxe
Por Oskar Viéitez |
-
O BNG pediralle á Xunta que colabore coa Deputación nos seus plans de compostaxe
Por Oskar Viéitez |
-
Ana Pontón ve o plan de compostaxe de Pontevedra como unha "referencia" internacional
Por Alejandro Espiño & Mónica Patxot |
-
A sobreaportación nos composteiros de Eduardo Pondal obrigará a poñer máis ou pechalos
Por Oskar Viéitez |