A Garda Civil intercepta 80 condutores positivos en alcol e 49 en drogas tras a Festa da Auga
Por Redacción
O dispositivo especial de seguridade posto en marcha con motivo da Festa da Auga volveu a deixar un ano máis un número rechamante de condutores interceptados por superar a taxa de alcol permitido ao volante ou por conducir baixo os efectos das drogas.
Efectivos da Agrupación de Tráfico da Garda Civil realizaron algo máis de 3.000 probas de alcol e drogas na rede viaria do termo municipal de Vilagarcía de Arousa.
En concreto realizáronse un total de 3.329 probas para vixiar o consumo de substancias psicoactivas, detectando 80 condutores que deron positivo en alcol e 49 en drogas.
Dos interceptados por superar a taxa de alcol permitida, 71 foron denunciados por vía administrativa e os 9 restantes por vía xudicial, por superar o 0,60 mg/ l. en aire inspirado. Pola súa banda realizáronse 97 probas de detección de drogas mediante test salival para comprobar a presenza no organismo de drogas, con máis do 50% de positivos aos cales se lles formulou expediente denuncia por vía administrativa. Esta infracción catalogada como moi grave está castigada cunha sanción de 1.000 € e a retirada de 6 puntos.
No ámbito penal, dous condutores foron detidos por tentar eludir os controis de alcoholemia e tentar fuxir condución de forma neglixente e temeraria. En ambos os dous casos atribúeselles a presunta comisión dun delito contra a seguridade viaria que levan penas de prisión de 6 meses a 2 anos e privación do dereito para conducir vehículos por tempo superior a un e ata 6 anos.