A Fiscalía pide sete anos de cárcere para un recluso da Lama por traficar dentro da prisión
Por Oskar Viéitez
A Sección Cuarta da Audiencia Provincial de Pontevedra sinalou para este xoves 16 de maio o xuízo contra M.G.R.
O día 14 de xullo de 2011 durante un cacheo persoal no interior do Centro Penitenciario da Lama onde cumpría condena, atopáronlle no peto da cazadora que tiña posta un total de 24 pastillas de Diazepam-Prodes 10 mg, e 30 pastillas de Rubifén e 47 pastillas de Trankimazin e un anaco de haxix de 10 gramos de peso.
Segundo o escrito de acusación da Fiscalia "o acusado portaba as referidas substancias coa intención de entregalas a cambio de prezo a terceiras persoas ". Na mesma cazadora, dentro do forro, atopáronse 80 euros en efectivo, procedentes de anteriores vendas.
O fiscal pide para o acusado a pena de sete anos de prisión e multa de 1.800 euros xa que entende que estes feitos constitúen un delito contra a saúde pública na súa modalidade de posesión de sustancias que causan grave dano á saúde preordenada ao tráfico, agravado pola circunstancia de haberse producido no interior dun centro penitenciario.