Os comerciantes de San Román sacan as súas tendas a pé de rúa
Por Redacción & Diego Torrado
A rúa San Román, que une as prazas da Ferrería e da Verdura, sumouse por vez primeira á iniciativa A pé de rúa, que pretende dar visibilidade e dinamizar o comercio de proximidade.
Fíxoo este sábado e nel, a diferenza doutras zonas da cidade, os comercios sacaron os seus artigos á rúa, facendo un mercado no que houbo descontos e promocións especiais.
Desde primeira hora da mañá, ademais da venda directa dos seus produtos, a rúa estivo amenizada con música e con programación paralela para os máis cativos.
Iniciativas como A pé de rúa amosan, segundo a concelleira de Promoción da cidade, Anabel Gulías, que o tecido comercial de Pontevedra "está moi vivo" e a proba é que esta proposta de visibilización e dinamización do comercio "ten continuidade no tempo".