A "boa sintonía" entre Concello e Deputación chega ao patrocinio de actividades culturais
Un día despois da súa reunión con Alberto Núñez Feijóo, o alcalde de Pontevedra mostrou a boa relación que mantén tamén coa presidenta da Deputación, Carmela Silva, coa que Miguel Anxo Fernández Lores asinou un novo convenio para destinar case 472.000 euros ao patrocinio de actividades artísticas e culturais na cidade.
Este convenio, que ten carácter bianual, permitirá financiar iniciativas como os festivais Surfing the Lérez e Novos Cinemas, programas como Sete Falares, Paseantes, Itineranta ou Experimenta e Acción, actividades como a Aña Urbana ou a Festa dos Libros e novas iniciativas como Cabos Soltos ou a exposición Pontevedra, unha cidade do século XXI.
Fernández Lores asegurou estar "orgulloso" dunha relación que beneficia "de forma clara" aos cidadáns de Pontevedra, respectando que sexa o goberno municipal o que decide onde se invisten os fondos que transfire a Deputación.
Para completar o mandato, dixo, avanzarase en novos acordos bilaterais para executar os novos viarios perimetrais ao hospital de Montecelo e para despregar os máis de 8.000 composteiros individuais que se repartirán por todo o rural pontevedrés.
A presidenta provincial, pola súa banda, quixo resaltar que co alcalde de Pontevedra "todo é moi fácil", ao apreciar a súa "empatía" e a súa "facilidade" para chegar a acordos, destacando a "boa sintonía" que existe entre ambos.
Esta relación permitiu, lembrou Silva, a firma de convenios para abordar, entre outras actuacións, o saneamento do Gafos, os campos de fútbol de Ponte Sampaio, Salcedo ou Campañó, os novos accesos a Monte Porreiro e Príncipe Felipe, o centro social do Burgo, a Rolda Leste ou a mellora de diversas estradas.
A eles súmase agora este acordo para financiar estas actividades artísticas nunha cidade, dixo Silva, que é unha "referencia" na promoción cultural; ou a colaboración en eventos deportivos que se celebrarán en 2019 como o Mundial júnior de balonmán ou o Festival Multideporte de tríatlon, que traerá a Pontevedra cinco mundiais desta disciplina.
Relacionadas:
-
Dez formacións exercen de 'Paseantes' con itinerarios musicais no centro urbano
Por Redacción |
-
Cabos Soltos, a nova aposta do Concello pola escena creativa emerxente
Por Redacción |
-
Case corenta concertos amenizarán en Pontevedra o debut do programa "Cabos Soltos"
Por Alejandro Espiño |
-
Pontevedra alíase, a través de 'Cabos soltos', con case 40 locais para protexer a música en directo
Por Alejandro Espiño |
-
Carmela Silva e Lores presumen de lealdade institucional cun convenio para crear o centro social dos Campos
Por Redacción |
-
Novos Cinemas apúntase ás datas previas ao Nadal para ofrecer as películas máis alternativas
Por Mónica Patxot & Redacción |
-
O dispositivo de seguridade e mobilidade dos mundiais de tríatlon, a exame
Por Alejandro Espiño |
-
A Deputación presenta un orzamento de 158 millóns de euros no que reduce a súa débeda
Por Oskar Viéitez & Mónica Patxot |
-
O centro social do Burgo afianza a "boa saúde" da relación entre Concello e Deputación
Por Alejandro Espiño |
-
Silva e Lores asinan un convenio de 2,4 millóns para financiar dous campos de fútbol
Por Oskar Viéitez & Mónica Patxot |