Tino Fernández optará a liderar a candidatura do PSdeG-PSOE nas próximas municipais
Por Alejandro Espiño
O actual portavoz do PSdeG-PSOE en Pontevedra, Tino Fernández, formalizou este mércores a súa candidatura ás primarias que os socialistas puxeron en marcha para elixir á persoa que optará á Alcaldía de Pontevedra nas próximas eleccións municipais, que se celebrarán en maio de 2019.
Fernández, que xa encabezou a candidatura socialista en 2015, explicou que optou por dar o paso e presentarse a este proceso pola "confianza e apoio" que lle transmitiron os seus compañeiros da executiva do PSdeG-PSOE, do actual grupo municipal e "moitos militantes" cos que falou nos últimos meses.
O dirixente socialista entende que o proxecto iniciado hai case catro anos "vai calando" entre os cidadáns e que as propostas presentadas durante este tempo son "ben valoradas" polos veciños de Pontevedra.
"É bo manter a continuidade, mellorando o que haxa que mellorar, sendo receptivos ás propostas dos cidadáns", sinalou Tino Fernández, tras presentar a súa precandidatura ás primarias.
O obxectivo, sinalou, é lograr que en Pontevedra haxa un goberno "de esquerdas e progresista" que pense nas persoas "antes que nas beirarrúas" e que estea sustentado por un partido "sólido e comprometido" co municipio.
Esa liña, segundo Fernández, será a base do proxecto que se presentará primeiro aos militantes que elixirán o candidato á Alcaldía e, posteriormente, a todos os veciños de Pontevedra.