A Deputación presenta un orzamento de 158 millóns de euros no que reduce a súa débeda
Por Oskar Viéitez & Mónica Patxot
Os orzamentos da Deputación de Pontevedra para 2019 achéganse aos 158 millóns de euros. Exactamente, 157.962.348 euros que, se se ten en conta o orzamento consolidado, que inclúe a escola universitaria de Enfermería e os dous consorcios contra incendios, ascendería a 161.384.163 euros.
A presidenta da Deputación de Pontevedra, Carmela Silva, e o vicepresidente, César Mosquera, informaron en rolda de prensa dos orzamentos da institución destacando que se presentan "para que entren en vigor o 1 de xaneiro", do mesmo xeito que ocorreu durante todo o mandato do bipartito PSOE e BNG.
"Estamos moi contentos de que podamos presentar hoxe estes orzamentos que se corresponden exquisitamente co que asinamos no pacto de goberno", valorou Mosquera.
Desde o ano 2016 as contas provinciais foi crecendo de maneira constante. Xunto a esta característica, Carmela Silva subliñou que a débeda da institución provincial reduciuse, "cando chegamos era 39 millóns de euros, hoxe é de 12 millóns e terminará no 2019 con 7 millóns de euros".
Tamén se contiveron os gastos correntes cun incremento para o próximo exercicio do 1,6% e cumpríronse cos requisitos que marca o Estado de estabilidade orzamentaria, regra de gasto e límite de débeda.
PLAN CONCELLOS
Para a iniciativa "estrela" do goberno provincial dedícanse 43,4 millóns. É dicir, respecto ao orzamento anterior crece un 3,3% o Plan Concellos, polo que se conceden en réxime de concorrencia competitiva aos concellos de menos de 50.000 habitantes fondos propios da Deputación. Concretamente destínanse 30 millóns a investimentos en obras e servizos de competencia municipal; 9,5 millóns para emprego e 3,9 para actividade de gasto corrente.
Carmela Silva sinalou que cando gobernaba o Partido Popular na Deputación o investimento medio nos concellos era a metade, de 20 millóns de euros.
César Mosquera chamou a atención sobre esta aposta do goberno provincial polos concellos sinalando que só o "sostemento da Deputación", ocupa uns 80 millóns de euros, que se destinan ao funcionamento da institución, o Centro Príncipe Felipe, a finca de Mouriscade, a Estación Fitopatolóxica do Areeiro, a Escola de Cantería ou o Museo de Pontevedra.
Entre o diñeiro destinado aos servizos destacan o de Infraestruturas, que recibe 17,67 millóns; ou Cohesión Social e Xuventude, cuxa dotación superará os 6 millóns. Novas Tecnoloxías (5,73 millóns), Deportes (5 millóns), Cultura (4 millóns), Turismo (3,6 millóns), Emprego (3,3 millóns), Medio Natural e Desenvolvemento Rural (1,8 millóns) ou Igualdade (1,27 millóns) recibirán tamén cantidades significativas, do mesmo xeito que o Museo de Pontevedra, que contará con 4,4 millóns para 2019.
Discrecionais, é dicir, que o goberno provincial poida decidir a que os destina, quedan uns 78 millóns dos que 66 vanse en transferencias correntes e de capital, maioritariamente a concellos (54 millóns), e o resto para a Universidade de Vigo, padroados, ou entidades privadas, fundamentalmente asociacións e clubs deportivos e sociais.
"Non nos dedicamos, como pasou noutras épocas, a utilizar a Deputación como contrapeso doutras institucións", asegurou Mosquera, presumindo que "está a ser un mandato extraordinariamente frutífero" que, segundo engadiu, "cambiou totalmente a dinámica desta institución".
Engadiu que o diñeiro non se gasta en "chafalladas" ou "sobrecustos", polo que mostrou o seu "orgullo" pola dinámica alcanzada polo goberno provincial, ao non utilizar a Deputación para "fins espúreos e perversos" e desenvolver o seu labor coa "máxima transparencia" e coas contas "claras"
Relacionadas:
-
O pleno da Deputación, cos votos do PSOE e o BNG, aproba o orzamento para 2019
Por Oskar Viéitez & Mónica Patxot |
-
Carmela Silva evita aclarar se repetirá como candidata a presidir a Deputación
Por Oskar Viéitez |
-
Para o PP o único positivo do orzamento da Deputación para o 2019 é que será o último do bipartito
Por Oskar Viéitez |
-
A Deputación aproba novos investimentos en Vilagarcía e A Lama
Por Redacción |
-
Novo plantón de Carmela Silva ao Parlamento ante os "ataques políticos" do PP
Por Oskar Viéitez | Creada e actualizada
-
A "boa sintonía" entre Concello e Deputación chega ao patrocinio de actividades culturais
Por Alejandro Espiño & Mónica Patxot |