18 empresas aspiran á reforma da PO-531, no lugar da Devesa
Por Redacción
Un total de 18 empresas presentaron as súas ofertas para a execución da segunda fase de acondicionamento e mellora da seguridade viaria da estrada autonómica PO-531 na Devesa, no concello de Pontevedra.
O orzamento estimado desta actuación impulsada pola Consellería de Infraestruturas e Mobilidade, incluíndo as expropiacións dos 52 predios necesarias para a mellora desta estrada que comunica Pontevedra con Vilagarcía, entre os puntos quilométricos 6+500 e 7+250, rolda os 578.000 euros.
Esta actuación supón darlle continuidade ao acordado cos veciños para a mellora da seguridade viaria na estrada autonómica PO-531 e iniciada coa execución do acceso ao polígono de Sequeiros, no concello de Barro.
O obxectivo desta obra é reducir a velocidade de circulación para o que se define a execución dunha glorieta de 44 metros á saída do núcleo da Devesa.
Na glorieta entroncarase un ramal de novo trazado, que se conectará coa vía principal deste núcleo e que permitirá eliminar o carril central para realizar o xiro á esquerda da intersección do punto quilométrico 6+620.
En relación á actuación a executar no tramo desta estrada, no Concello de Barro, o novo proxecto estará listo a principios do 2019.
Tamén nesta vía a Xunta ultima a reformulación do proxecto para actuar no treito que descorre polo municipio de Barro, segundo a petición do concello e os veciños.
Relacionadas:
-
Aproban a expropiación de 25 leiras para construír unha senda peonil na PO-531
Por Redacción |
-
A Xunta adxudica a Marconsa as obras da segunda fase na estrada PO-531, na Devesa
Por Redacción |
-
O DOG publica a urxente ocupación dos bens afectados pola rotonda da PO-531, na Devesa
Por Redacción |
-
A Xunta dá luz verde ás expropiacións para a reforma da PO-531 na Devesa
Por Redacción |