Micaela Malleiro e Silvia Carballido gañan o concurso de debuxo do 25-N en Ponte Caldelas
Por Redacción
Micaela Malleiro, alumna do colexio Cordo Boullosa, e Silvia Carballido, do instituto de Ponte Caldelas, foron as alumnas gañadoras do concurso de debuxo organizado polo Concello con motivo do 25-N, Día Internacional contra as Violencias Exercidas contra as Mulleres.
O Concello entregou os diplomas ás gañadoras como parte dos actos organizados dentro da campaña #EuTomoParte, que aglutina un completo programa de actividades ao longo de todo o mes.
Os debuxos, que representan o rexeitamento e alerta diante das violencias machistas, están xa incorporados ao cartel institucional de Ponte Caldelas por esta efeméride. En total, presentáronse 102 traballos e os 100 restantes están expostos na Casa da Cultura ata o próximo día 28 de novembro.
Ponte Caldelas acolleu tamén este martes un faladoiro coa médica e educadora Lola Ferreiro, especialista en educación con perspectiva de xénero. O programa municipal continúa este mércores co comezo dos obradoiros de empoderamento feminino para o emprego, que se van celebrar na Casa de Cultura todos os mércores ata o 12 de decembro.
O acto central será o próximo domingo, día 25, a partir das 19.00 horas. Comezará co II Encontro de Mulleres Rurais e contará coa presencia da actriz e cantante galega María Costas.