Jaime Olmedo, presidente en funcións, e Alejandro Regueiro, candidato a sucederlle á fronte do Liceo Casino de Pontevedra, pecharon este venres campaña electoral, abrindo un espazo dunha semana ata a cita do próximo venres, día 30 de novembro, na que os socios da veterana sociedade pontevedresa teñen unha segunda chamada as urnas para resolver e decidir o sorprendente empate rexistrado no primeiro proceso electoral realizado o 30 de setembro pasado.

Como peche de campaña, ambas as candidaturas dirixíronse aos socios tratando de facerlles ver a importancia da súa participación e chamando a votar.

Ademais dun comunicado remitido aos socios, a candidatura de Alejandro Regueiro publicou como peche de campaña un novo vídeo, co título "O teu voto decide" no que os membros do seu equipo, xunto con diferentes persoas que apoian a súa opción, chaman á participación, tentando concienciar á masa social da importancia de que acudan a votar o vindeiro venres.

Regueiro vai máis aló para destacar a importancia destas eleccións, manifestando: "É evidente que estas eleccións non son como as eleccións a unha alcaldía, pero non é menos certo que o Liceo Casino, con ao redor de 2.000 socios e máis do dobre de usuarios e coa súa historia, é unha entidade con moito arraigamento na cidade e que esperta gran interese na mesma".

Pola súa banda, Jaime Olmedo dirixiuse tamén aos socios a través dunha carta que comeza lembrando o sucedido na primeira convocatoria: "As eleccións pasadas terminaron cun empate, situación que nos levou a este novo proceso electoral e a tomar consciencia da importancia que ten un só voto", para resaltar os puntos fortes do seu equipo e terminar afirmando que "o noso traballo aválanos para seguir gozando da túa confianza e, se así fóra, comprometémonos a seguir esforzándonos como ata agora".

Na devandita comunicación, Olmedo adxunta novamente o seu programa, que basicamente calca os mesmos puntos que expuxeron na anterior convocatoria, coa esperanza de que nesta ocasión consigan o respaldo maioritario da masa social e así renovar o seu mandato por outros catro anos.

A resposta, quizais máis incerta que nunca, terémola o vindeiro venres, día 30 de novembro, nunha xornada de votacións que se presume intensa e emocionante.