Propoñen aumentar a protección patrimonial a edificios modernistas e industriais
Por Alejandro Espiño
Pontevedra quere ampliar o número de inmobles protexidos polo seu valor artístico ou histórico, ao entender que poden supoñer un "recurso máis" para promocionar a cidade. Así o asegurou a edil de Urbanismo, Anabel Gulías.
Para esta iniciativa, o Concello iniciou os trámites para actualizar o catálogo de edificios a conservar, que busca incluír exemplos de boa arquitectura do século XX. Non se revisou desde 1997 e o goberno municipal quere reforzar a súa protección para evitar que se perdan inmobles de alto valor patrimonial.
Un primeiro paso será, segundo Gulías, solicitar ao servizo de Patrimonio da Xunta que remita a listaxe con todos os edificios de Pontevedra susceptibles de ser incluídos neste catálogo que, posteriormente, será completado coa información municipal.
Ademais, analizarase as zonas de protección que rodean a cada un destes inmobles para poder "racionalizar" estas áreas, de forma que se poidan axilizar as licenzas que se soliciten tanto particulares como colectivos ou institucións dentro deste ámbito.
A maiores, o Concello quere "revisar" o tipo de inmobles que están incluídos neste catálogo. Anabel Gulías sinalou que, ata agora, os edificios analizábanse sempre dunha perspectiva "historicista", cando existe patrimonio "modernista e industrial" que merece ter "algún nivel de protección".
Esta medida, xunto coa posta en valor deste patrimonio, pretende ofrecer unha maior seguridade xurídica aos propietarios e permitirá dar "certa rapidez" aos trámites urbanísticos que se soliciten, xa que ao estar inventariado sería "innecesario" en moitos casos a correspondente consulta ao departamento de Patrimonio.
Relacionadas:
-
Pontevedra protexerá o seu patrimonio industrial e a arquitectura contemporánea
Por Alejandro Espiño |
-
A pegada de Alejandro de la Sota, eixo dun roteiro de arquitectura en Pontevedra
Por Redacción |
-
Aproban un decálogo de medidas para axilizar os trámites urbanísticos no Concello
Por Alejandro Espiño |
-
Propoñen que a fábrica da Cross se inclúa no catálogo de bens culturais de Galicia
Por Redacción |