Música e memoria protagonizan os roteiros musicais pola provincia que oferta a Deputación
Por Redacción
O departamento provincial de Cultura e Lingua, en colaboración coa Asociación de Gaiteiros Galegos (AGG), organiza seis percorridos pola tradición musical da provincia que darán comezo o vindeiro sábado, 4 de maio, en Cerdedo-Cotobade con Ricardo Portela como protagonista.
As rutas continuarán por Vigo, cun percorrido sobre os Morenos de Lavadores; Pontevedra e Poio cos gaiteiros Manuel Villanueva, Perfecto Feijoo e Xan de Campañó como protagonistas; Forcarei e os gaiteiros de Soutelo; Redondela e Pontevedra con Casto Sampedro; e rematará en Tomiño coas Treboadas do Baixo Miño.
Cada un dos roteiros contempla 50 prazas e a participación é de balde, previa inscrición no enderezo de correo electrónico roteiros.cultura@depo.gal
O obxectivo deste ciclo é o de propiciar novos espazos de encontro, nos que a memoria da provincia se vencelle coa súa historia na música tradicional, a través dun percorrido pola vida e obras dalgúns persoeiros, agrupacións e formacións máis destacados de cada zona. Cada percorrido contará coa compaña especial dun guía especializado e cunha actuación musical específica.
Neste Ano da Música e partindo de que a provincia de Pontevedra foi cerne de gran parte da mellor música tradicional con grupos e personaxes senlleiros de referencia imprescindible para toda Galicia, este ciclo de roteiros pretende preservar e poñer en valor o legado de grupos, formacións e gaiteiros históricos nados na provincia: Os Areeiras, Os Campaneiros de Vilagarcía, Manuel Villanueva, Os Morenos de Lavadores, Os Moxenas, Os Soutelos de Montes, Ricardo Portela, ou Xoán de Campañó.