Levan 17 meses de conflito e máis de catro meses secundando unha folga indefinida que vai continuar despois de que maioritariamente os traballadores dos Puntos de Atención Continuada de Galicia (PACs) teñan votado en contra da proposta que lles realizaba o Servizo Galego de Saúde (Sergas).

No Centro de Saúde da Parda instalábase a urna para levar a cabo estas votacións coa presenza de numerosos profesionais dos PACs. Neste colexxio e no do Salnés, o resultado foi contundente. Só seis votos eran favorables a porlle fin ao paro indefinido mentres que 49 apoiaban continuar coa folga. En Galicia, a favor da proposta do Sergas votaron 78 persoas e en contra, 268.

O referéndum tamén recollía un segundo punto en que se propoñía retirar da negociación o cómputo de xornada. Unha opción que votaron 147 fronte aos 175 que en toda Galicia decidiron apoiar a contraproposta de PACs en pé de guerra.

Este resultado vai ser trasladado ao Sergas e este vindeiro venres 10 celebrarase unha xuntanza do comité de folga para decidir os seguintes pasos a dar, segundo representantes do colectivo.

As negociacións atópanse enquistadas principalmente por ese punto do cómputo de xornada, xa que os profesionais sanitarios denuncian que cando piden un permiso laboral remunerado rematan debendo esas horas de traballo.