O Concello de Barro acusa o PP de "difundir bulos" sobre a piscina municipal
Por Redacción
O goberno municipal de Barro acusou este luns ao PP de "difundir bulos" sobre o proxecto da piscina municipal, unha obra que financia o Concello e a Deputación de Pontevedra.
"Nin as arcas do Concello nin da Deputación van ter que poñer máis diñeiro para este proxecto do que xa estaba previsto", aseguraron desde o goberno que dirixe o nacionalista Xosé Manuel Fernández Abraldes.
Os populares, engaden desde o Concello, están "preocupados" porque ven "cada vez máis difícil" recuperar o goberno municipal. Esa "desesperación", afirman, é a que está detrás das "mentiras" que lanzan para "embarrar" a campaña electoral.
O PP denunciou unha serie de irregularidades administrativas nesta obra que, segundo o Concello, non son tal.
Recoñecen que, na execución de obras, "sempre poden aparecer cuestións" que leven a unha administración a modificar o proxecto inicial co obxectivo de solucionar algún problema ou de mellorar o proxecto. "Isto é algo totalmente regular, recollido na lei de contratos e que sucede constantemente en todas as administracións", explican.
O pleno do concello aprobou un modificado do proxecto da piscina, nas condicións que se estipulan no prego de contratación e sen superar o 20% do mesmo. Todo iso, ademais, "perfectamente xustificado" en todos os informes técnicos de ambas administracións.
Ademais, o Concello ironiza con que o PP "nos seus bulos non é nin rigoroso nos números que fan e utilizan demagoxicamente cantidades inexactas".
O goberno municipal destaca que eles fan as cousas de xeito "limpo, pulcro e transparente", algo que choca "frontalmente" co estilo do Partido Popular de Barro.
Relacionadas:
-
Arquivada a denuncia do PP contra o alcalde de Barro polas obras da piscina municipal
Por Oskar Viéitez |
-
O alcalde de Barro declarará como investigado no xulgado pola obra da piscina municipal
Por Natalia Puga |
-
O PP de Barro denuncia ante a Fiscalía o goberno do BNG e PSOE por unha desviación de 69.848 nas obras da piscina
Por Redacción |
-
A piscina municipal de Barro estará rematada "en maio ou xuño"
Por Redacción |