Poio edita 18.000 guías turísticas para este verán
Por Redacción
A concellería de Turismo de Poio saca á luz novo material turístico de fronte ao comezo do verán e á apertura das oficinas municipais de turismo. Nestes espazos xa se atopa ao dispor dos visitantes un folleto-guía de 24 páxinas a cor que recolle todos os recursos de interese turístico do municipio.
Esta guía contén fotografías de alta calidade e un mapa turístico coas ofertas de lecer e de descanso que ofrece este Concello. Segundo informan desde o goberno local, editouse unha versión galego-castelá coa publicación de 10.000 exemplares e outra versión en inglés-francés cun total de 8.000 folletos. Ademais estes materiais tamén se atopan dispoñibles en formato pdf, que se pode descargar desde a páxina web do Concello.
Tamén se editou un novo plano xeral de Poio, coa publicación de 10.000 exemplares. Neste material recóllese a información máis actualizada coa inclusión de todos os miradoiros do municipio, as sendas que se poden percorrer pola costa, a Variante Espiritual do Camiño de Santiago e diversos servizos complementarios.
Con este material, a concellería de Turismo substitúe os anteriores folletos e actualiza estas ferramentas ante a chegada de turistas ao longo destes meses.