O Museo perde outro chopo
Por Mónica Patxot
Técnicos da Estación Fitopatolóxica do Areeiro supervisaron os traballos para retirar do entorno do Sexto Edificio do Museo un chopo seco. É o segundo exemplar desta árbore de gran porte que perde a institución museística xa que hai dous anos foi retirado outro.
A tala comezou ás nove de mañá e rematouse en tres horas.
O persoal técnico de Areeiro comezou retirando as pólas da copa, para o que non foi preciso motoserra xa que estaban totalmente secas e partían ao manipulalas a man. Logo seguiron facendo toradas co tronco.
A dirección do Museo está agora a valorar a idoneidade de substituír as pezas arbóreas que faltan na zona por outras doutras especies máis acaídas ou retirar os tocos e anular os parterres para poñer lousado.