O parque forestal da Fracha, máis preto de facerse realidade
Por Alejandro Espiño
Trinta e oito novas hectáreas de monte comunal de Tomeza, Marcón e A Canicouva súmanse ao parque forestal da Fracha. O Concello aprobou este luns a aceptación destes terreos, un trámite necesario para sacar a contratación o proxecto de acondicionamento, valorado en case 605.000 euros, e que será financiado con fondos europeos.
A portavoz do goberno municipal, Anabel Gulías, explicou se trata dunha cesión de balde por 30 anos. No caso da comunidade de montes de Tomeza, ceden 78.900 metros cadrados valorados en 177.525 euros; Marcón, 128.900 metros cadrados valorados en 1.501.115 euros; e A Canicouva achegan ao parque 180.600 metros cadrados cunha valoración de 270.900 euros.
O futuro parque forestal da Fracha será o máis grande de Pontevedra. Terá máis de 406 hectáreas e contará con tres áreas de descanso e 26,6 quilómetros de senda. Prevese a plantación de árbores de sombra, a recuperación de bosques de ribeira, a limpeza de especies invasoras ou a aplicación de tratamentos antierosión nos terreos.
A entrada ao parque será polo aparcamento en Outeiro Navío (Marcón), onde chegan as vías asfaltadas. Aquí estará unha das tres áreas de descanso, na que se plantarán 200 carballos, 50 castiñeiros e 30 catalpas.
Na Rega Pireira (Tomeza) estará a segunda destas áreas. Nela haberá 70 carballos, 20 castiñeiros, oito catalpas e 30 bidueiros. E, por último, no Coto das Forcadas (A Canicouva) plantaranse 60 carballos, 20 castiñeiros e tres catalpas.
Ademais, xunto coa eliminación de 160.000 eucaliptos e acacias, prevese reforestar oito hectáreas en Marcón con 3.340 carballos, outras 6,5 hectáreas en Tomeza con 1.950 carballos e 3,5 hectáreas na Canicouva con 700 novos carballos.
Haberá ademais novos accesos a estas áreas de descanso, que terán peches perimetrais, mesas accesibles, fontes de auga e diversos miradoiros sobre as rías de Pontevedra e Vigo.
O investimento previsto alcanza os 2,7 millóns de euros aos que hai que sumar uns 60.000 euros que, cada ano, se destinarán a mantemento do parque.
Relacionadas:
-
Elsamex acondicionará o parque forestal da Fracha, o máis grande que terá Pontevedra
Por Alejandro Espiño |
-
O Concello inicia a contratación do parque forestal da Fracha
Por Oskar Viéitez |
-
Monte Vivo creará un anel verde para protexer a cidade e os núcleos rurais
Por Alejandro Espiño |
-
Os traballos para acondicionar o parque forestal da Tomba durarán ata 2020
Por Alejandro Espiño |
-
O parque forestal da Fracha impulsará plantar 11.000 árbores e eliminar 160.000 acacias
Por Natalia Puga |