Sanxenxo reciclou 5.420 litros de aceite usado nos primeiros oito meses do ano
Por Redacción
O novo sistema de recollida de aceite usado instalado en Sanxenxo parece estar a funcionar á perfección. No primeiros oito meses do ano, lográronse reciclar 5.420 litros, segundo os datos que desvelou o goberno municipal.
Esta recollida evitou a contaminación e posterior depuración de case 6 millóns de litros de auga. O obxectivo é acabar 2019 con máis de sete mil litros reciclados e poder dobrar esa cantidade en 2020.
Sanxenxo conta actualmente con 17 contedores de recollida de aceite distribuídos entre todas as parroquias e vilas.
Entre eles destacan polo nivel de recollida dous de Portonovo, o da Rúa da Perla con 970 litros recollidos en oito meses e o da Rúa do Espiñeiro con 940 litros.
Nas próximas semanas, Sanxenxo colocará sete contedores máis. Haberá tres máis en Portonovo, un na Granxa, un en Luís Rocafort, un na rúa Progreso e outro nas inmediacións do Mercadona.