A Praza da Peregrina acolleu este venres unha carpa informativa sobre o Plan Revitaliza, o programa de compostaxe que a Deputación está a poñer en marcha en toda a provincia, que captou a atención de decenas de peóns que se achegaron ao posto para solicitar información sobre esta iniciativa e levar unha das plantas aromáticas que regalaban os traballadores. 

"Esta carpa forma parte do deseño da campaña do plan de compostaxe, é a sexta que se fai en toda a provincia e seguiranse facendo. Aínda que tamén imos porta por porta, esta é para un público máis xeneralista, entregamos tamén material informativo e fichas para facer unha solicitude de composteiro individual ou comunitario, logo veremos en que prazo poderanse atender", explicou César Mosquera, vicepresidente da Deputación e un dos impulsores deste plan ecolóxico.

Ademais de Mosquera, á Praza da Peregrina achegáronse esta mañá os concelleiros de Residuos Urbanos, Raimundo González; e o do rural, Alberto Oubiña; para comprobar en persoa o interese que suscita este programa entre a poboación. Durante toda a mañá o movemento foi constante o que constata a sensibilidade dos pontevedreses pola correcta xestión dos residuos orgánicos. "Este programa parte de que a xente está sensibilizada e cre que hai que facer algo con isto. Non se pode seguir castigando o planeta. O que facemos son medidas para canalizar esa sensibilidade", explicou o vicepresidente, quen asegura que hai veciños que están a compostar nos seus balcóns ou cociñas.

Dar visibilidade ao Plan Revitaliza é só un dos alicerces sobre os que se sustenta esta iniciativa provincial que captou a atención de países como China, que visitou Pontevedra recentemente para coñecer o seu funcionamento. "Tentamos cubrir todos os flancos: o da investigación, comunicación, a modificación de hábitos e costumes, a implantación de medios para que funcione e a formación de xente para que funcione ben", concluíu Mosquera.

Pantalla completa