O novo edificio do Museo destinado á arqueoloxía estará en Valdecorvos
Por Alejandro Espiño
O Museo de Pontevedra terá un espazo "digno" para exhibir a súa notable colección de arqueoloxía. Será nun edificio "noble" de nova construción, segundo avanzou este mércores o vicepresidente da Deputación, César Mosquera. Tras un 'casting' entre posibles emprazamentos, o inmoble estará na zona de Valdecorvos.
O edificio destinado a arqueoloxía ocupará a parcela de 10.055 metros cadrados que, no seu día, foi ofertada á Xunta de Galicia para construír o finalmente descartado colexio de Valdecorvos e, nestes momentos, funcionaba como aparcamento disuasorio.
Para a súa construción, o Concello de Pontevedra cederá estes terreos á Deputación que, lembrou Mosquera, xa reservou un millón de euros nos orzamentos de 2020 para afrontar este proxecto. En total, calcula que o investimento alcanzará os tres millóns.
Este novo edificio, que o Museo quere ter "feito e dotado" en 2021, terá un espazo de almacenaxe "moi potente", unha área para oficinas ou un laboratorio para clasificar, catalogar ou restaurar os restos arqueolóxicos que reciba. Ademais, haberá unha zona destinada a investigación e, por suposto, unha ampla zona de exposición ao público.
Ocupará uns 4.000 metros cadrados e o resto da parcela será acondicionada con zonas verdes e unha área de aparcamento.
En principio, a falta da decisión dos técnicos, a intención do Museo é trasladar a este edificio todos os fondos pétreos -miliarios ou restos prehistóricos- que atesoura a institución, que recuperaría algúns que actualmente están cedidos a varios municipios por falta de espazo, pero non outras coleccións como, por exemplo, o tesouro de Caldas.
O responsable político do Museo explicou que esta decisión vén motivada pola "necesidade" de que un museo que é a "referencia" da provincia para os restos arqueolóxicos conte con espazo para custodiar e exhibir todo este material que, debido ao seu tamaño e o seu peso, "se leva mal cun edificio urbano".
"É o que están a facer todos os museos que teñen arqueoloxía nos seus fondos", sinalou Mosquera, que recoñeceu que a Deputación chegou a barallar como posibles localizacións a imprenta provincial, uns terreos na Parda, os polígonos de Barro e A Reigosa, o castelo de Soutomaior ou o Pazo de Liñares (Lalín).
Este proxecto forma parte da política "ambiciosa" que, segundo Mosquera, emprenderá o Museo de Pontevedra, unha institución "con máis potencialidades das que está tendo" e que incluirá ademais a reforma integral dos edificios de Castro Monteagudo e Flórez, actualmente pechados ao público polo seu estado de deterioración.
Relacionadas:
-
Comeza a roza da parcela de Valdecorvos que albergará o novo edificio de Arqueoloxía do Museo
Por Redacción |
-
O 2019 garda a lembranza de Antonio Fraguas, abre o futuro do Museo e deixa a pegada de James Rhodes e Rozalén
Por Diego Torrado & Mónica Patxot & Cristina Saiz & Anxo Lourido |
-
Acordo entre Concello e Deputación para impulsar a ampliación do Museo de Pontevedra
Por Redacción |
-
Ofertan catro parcelas en Valdecorvos para construír 137 vivendas protexidas
Por Redacción |
-
Un museo en Irún, "referente total" para o futuro centro de arqueoloxía de Valdecorvos
Por Alejandro Espiño |
-
Representantes do Museo de Pontevedra viaxan a Barcelona en busca de ideas para o edificio de Arqueoloxía de Valdecorvos
Por Redacción |
-
A Deputación aprema á Xunta para que inicie os traballos na Vía Verde do Salnés
Por Oskar Viéitez |
-
O Museo unirá baixo terra os edificios Castro Monteagudo, García Flórez e Fernández López
Por Alejandro Espiño |
-
Construirán un novo edificio para albergar a colección arqueolóxica do Museo
Por Alejandro Espiño |
-
José Manuel Rey, novo director do Museo de Pontevedra
Por Diego Espiño |