Jorge Cubela e Pepa Pardo, portavoces do Partido Popular na Deputación Provincial, reclaman ao goberno bipartito a rehabilitación inmediata dos dous edificios emblemáticos do Museo de Pontevedra, o Castro Monteagudo e o García Flórez, situados na contorna da praza da Leña. 

Estes dous edificios pechábanse en 2013 durante o goberno do Partido Popular na institución provincial que presidía Rafael Louzán. coa intención de realizar traballos de reacondicionamiento, que se foron dilatando no tempo. Desde entón non volveron a abrir as portas ao público.

Para Pepa Pardo, o actual goberno da  Deputación ofrece só "vaguedades e segredos". Desde o Partido Popular entenden que é necesario priorizar os recursos e que antes de anunciar a construción dunha nave en Valdecorvos como novo edificio do Museo é necesario rehabilitar estes espazos na mazá cultural.

Para os populares esta reforma non forma parte das prioridades do bipartito. Jorge Cubela denunciaba que a sociedade necesita saber que é o que quere facer o goberno do PSOE e do BNG cos dous inmobles. Neste sentido lembraba ao deputado nacionalista César Mosquera que levan cinco anos e con responsabilidades sobre o Museo sen que se coñezan os obxectivos para este espazo cultural.

Ademais alertou de que numerosos colectivos culturais non apoian que se constrúa o novo edificio en Valdecorvos e "se saque do centro histórico" mentres que os dous históricos permanecen pechados. 

HABERÁ NOVIDADES, DI CÉSAR MOSQUERA

O vicepresidente da Deputación César Mosquera afirmaba este martes, tras coñecer a petición do PP, que en breve haberá novidades "potentes" sobre a rehabilitación dos dous edificios históricos. Segundo avanzou, se está a traballar de maneira simultánea tanto no proxecto de mellora do Castro Monteagudo e do García Flórez como na construción do novo edificio de Valdecorvos que acollerá traballos arqueolóxicos. E apuntou que todas estas actuacións son "prioridades" para este mandato.

O obxectivo, afirmou Mosquera, é sacar adiante a rehabilitación tan pronto como sexa posible. Lembrou que a rehabilitación de edificios destas características é algo complexo.

Aclarou, ademais, que o traballo para mellorar o Museo é constante con tres obxectivos: a mellora da xestión, a rehabilitación e a construción do edificio de arqueoloxía.