A Deputación e a Universidade de Vigo renovan o convenio para complementar as bolsas do programa Erasmus+
Por Oskar Viéitez
A presidenta da Deputación de Pontevedra, Carmela Silva e o reitor da Universidade de Vigo, Manuel Reigosa, asinaron este mércores a terceira edición do convenio para a promoción da mobilidade internacional do seu alumnado.
As achegas distribúense en 90 bolsas destinadas para os bolseiros do programa Erasmus+ (en universidades europeas) e outras 10 para os beneficiarios das bolsas propias de intercambio da Universidade de Vigo (noutras institucións de países estranxeiros).
O convenio permite subvencionar 100 bolsas de 1.000 euros cada unha que complementan ás bolsas de Erasmus e ás bolsas propias de intercambio da Universidade de Vigo durante este curso.
A sinatura tivo lugar no Pazo Provincial da Deputación e asistiron a vicerreitora María Isabel Doval, a alumna Tania Pereira (beneficiaria dunha bolsa) e o profesor do IES Luis Seoane de Pontevedra Modesto Rozas.
A presidenta da Deputación de Pontevedra recordou que o convenio entre a institución provincial e a universidade xorde dunha situación de crise económica, onde se recortan recursos para a universidade "o que estaba impedindo que moito alumnado non puidese acceder ao programa Erasmus+".
Pola súa banda, o reitor da Universidade de Vigo fixo fincapé na importancia do programa Erasmus + salientando que "é o programa que máis está a facer por construír unha Europa que sexa garantía de paz, de progreso, de desenvolvemento social e xustiza".
En total, a Deputación de Pontevedra leva investido na promoción da mobilidade internacional da Universidade de Vigo 350.000 euros que permitiron que 350 alumnos puidesen completar a súa formación académica no estranxeiro.
ERASMUS+ PRACTICUM DEPO
A presidenta tamén afondou no proxecto propio da institución provincial, o Erasmus+ Practicum Depo, no que se levan investido 2,5 millóns de euros nesta iniciativa que está a permitir que 350 alumnos e 40 profesores de FP poidan realizar mobilidades noutros países da Unión Europea.
A presidenta puxo en valor esta iniciativa que está "ligada á actividade laboral e á formación".
Relacionadas:
-
Só seis Erasmus de Pontevedra regresaron a casa pola crise do coronavirus
Por Redacción |
-
A Deputación adxudica as accións formativas do programa 'Labora 2020'
Por Redacción |
-
O campus recibirá este curso 59 universitarios estranxeiros, a maioría de Brasil e México
Por Redacción |
-
Un cento de alumnos fará prácticas en países europeos cun programa da Deputación
Por Redacción |