Tráfico quere incorporar ao regulamento estatal parte da ordenanza de mobilidade de Pontevedra
Por Redacción
Pontevedra é un dos catro concellos do Estado cos que a Dirección Xeral de Tráfico (DXT) está a manter unha serie de xuntanzas previas á reforma do Reglamento General de Circulación en ámbito urbano (os outros tres son Sevilla, Valencia e Barcelona).
Por este motivo un equipo da DXT encabezado polo xefe da Unidade de Ordenación Normativa, Javier Villalba, e pola xefa provincial de Tráfico, Paula Yubero, achegouse a semana pasada ao Concello de Pontevedra para reunirse co equipo municipal de Mobilidade, encabezado polo concelleiro responsable desta área, César Mosquera.
O principal interese por parte da DXT era recoller achegas e coñecer a opinión do Concello para abordar a reforma da regulación estatal de circulación urbana toda vez que considera que a actual "é obsoleta e escasa". Neste marco, desde o Concello presentóuselle como proposta de traballo o texto da nova ordenanza reguladora da mobilidade amábel e da utilización dos espazos públicos que irá á aprobación inicial no pleno do luns.
En base á nova ordenanza municipal, desde a DXT manifestaron interese en incorporar no regulamento estatal cuestións como a aposta pola mobilidade peonil, os sistemas de redución de velocidade ou novas fórmulas de estacionamento por tempo limitado que superen o tradicional sistema de carga e descarga, como o aparcadoiro de servizos por 15 minutos implantado en Pontevedra.
O modelo de mobilidade desenvolvido en Pontevedra, xa coñecido pola DXT en encontros anteriores (o último tivera lugar en Madrid e participara o alcalde en calidade de presidente da entidade Cidades que camiñan), foi un dos elixidos para servir de referencia na concepción da reforma do regulamento estatal por ser un modelo implantado con éxito e que achega un traballo previo xa contrastado.
Desde a DXT manifestaron a necesidade de concibir a reforma da regulación sobre circulación urbana atendendo a novas xerarquías na mobilidade, posto que o actual regulamento está demasiado enfocado ao tráfico motorizado, polo que o seu interese se centra en modelos e medidas que favorezan e prioricen a mobilidade peonil.
Ademais da aposta pola mobilidade peonil e o interese polos novos sistemas de estacionamento, desde a DXT tamén se abordaron cuestións relativas á circulación de bicicletas e vehículos de mobilidade persoal, camiños e rutas escolares seguras, ou restriccións medioambientais.
Relacionadas:
-
Activan a campaña "Pontevedra Suma" para divulgar a nova ordenanza de mobilidade
Por Alejandro Espiño |
-
Amizade denuncia que a nova ordenanza discrimina ás persoas con mobilidade reducida
Por Redacción |
-
En outubro entrará en vigor a nova ordenanza de mobilidade, que inclúe os patinetes eléctricos
Por Oskar Viéitez |
-
Lores, desde Cádiz: "As cidades aínda son almacéns de coches, espazos agresivos, perigosos, que expulsan ás persoas"
Por Redacción |
-
A Deputación explica nun congreso o éxito das súas medidas de acougado de tráfico
Por Redacción |
-
Tráfico 'pon coto' aos patinetes: a menos de 25 km/h e prohibidos por beirarrúas e zonas peonís
Por Alejandro Espiño |
-
A DXT asume o modelo de Pontevedra
Por Redacción |
-
A DGT mira cara Pontevedra para regular a mobilidade peonil e ciclista no seu novo código
Por Alejandro Espiño |