A pesca e o marisqueo reforzan a súa seguridade ante o coronavirus
Por Oskar Viéitez
Como ocorre co sector agrogandeiro, a actividade tamén continúa no sector pesqueiro para prover de alimentos á poboación. A Consellería do Mar enviou ás confrarías de pescadores unha serie de recomendacións para o desenvolvemento da actividade nas lonxas, nos barcos de pesca e nos bancos e puntos de control marisqueiro ante a situación do coronavirus.
O executivo galego aconsella reducir a actividade presencial nas lonxas, limita a asistencia ás poxas a 50 persoas e impide a presenza nelas de persoas alleas ao comercio de produtos do mar.
Recomenda á frota que realice controis á tripulación previos ao seu embarque para asegurarse de que non teñen a enfermidade e insta a chamar ao Centro Radio Médico en caso de sospeitar da existencia dun positivo a bordo.
A Consellería do Mar pide ademais non realizar actividades marisqueiras a aquelas persoas máis vulnerables por motivos de saúde ou que teñan menores ou maiores ao seu cargos e solicita o reforzo das medidas de limpeza e hixiene a todos os profesionais e en todas as instalacións e o cumprimento dos consellos sobre o mantemento das distancias para evitar posibles contaxios.
A Consellería do Mar tamén elaborou un protocolo de servizos esenciais que rexerá a actividade portuaria durante o tempo de vixencia das medidas especiais derivadas da emerxencia sanitaria. Este protocolo de servizos esenciais oriéntase a garantir a actividade portuaria pesqueira, facilitando o subministro de servizos básicos aos mercados, e evitar a propagación do virus nos peiraos de titularidade autonómica.
Entre outras medidas destaca que en todos os peiraos serán atendidos por alomenos un celador con capacidade de asistencia presencial. Nas instalacións náutico recreativas a circulación de persoas e vehículos queda restrinxida a necesidades básicas. Ademáis, o servizo de practicaxe mantense en casos de necesidade inevitable.
Relacionadas:
-
A Deputación tramita xa as axudas ás confrarías, mariscadoras e cooperativas agrogandeiras
Por Oskar Viéitez |
-
Poio solicita á Xunta e ao Goberno central que habiliten liñas de axuda para as confrarías
Por Oskar Viéitez |
-
O sector do mar, en xaque polo coronavirus: "Os prezos son horribles. É unha barbaridade"
Por Alejandro Espiño |
-
VIDEO.- Así homenaxea a xente do mar ao persoal sanitario
Por Oskar Viéitez |
-
Opromar presenta o documental 'Bravas do mar' para reivindicar o papel da muller na pesca
Por Redacción |
-
As mariscadoras optan por quedar na casa
Por Oskar Viéitez |
-
O sector da conserva duplica quendas de traballo
Por Oskar Viéitez |
-
O sector agrogandeiro traballa con normalidade para abastecer os mercados
Por Oskar Viéitez |