Tres empresas de Caldas doan á vila material de protección contra o coronavirus
Por Redacción
Luvas, lentes, máscaras, traxes protectores, líquido desinfectante ou gorros. É parte da significativa doazón que tres empresas situadas en Caldas de Reis veñen de facer ao Concello na súa loita contra o coronavirus.
Este material de protección, en concreto, foi entregado pola compañía química Foresa e as alimentarias Clesa e Clavo Food Factory.
O Concello xa puxo este material a disposición do centro de saúde, a residencia da terceira idade, o persoal do servizo de asistencia domiciliaria , o persoal municipal de obras e limpeza, a Policía Local, Protección Civil e demais empregados das oficinas municipais.
O alcalde, José Manuel Rey, agradeceu este "enorme xesto de solidariedade" e destacou que iniciativas como esta "axudan moito nuns momentos tan duros que nos afectan a todos ".
"Dende o minuto un as tres entidades puxéronse á nosa enteira disposición", engadiu Rey,
Caldas, a través da comisión de seguimento do coronavirus, planificou tamén un operativo especial de limpeza e desinfección no casco urbano que se cubrirá co persoal de limpeza e o reforzo dos operarios do servizo municipal de obras e do corpo de Protección Civil.
Durante os próximos días realizaranse desinfeccións diarias nas contornas dos establecementos de alimentación, das farmacias, dos bancos e, en xeral, daqueles comercios que manteñan o servizo durante o estado de alarma.
Ademais, Benestar Social está realizando un seguimento diario de todos os anciáns e dependentes que viven sos para coñecer posibles necesidades ou atender urxencias. Calquera cidadán nestas condicións que precise axuda pode facer uso deste servizo especial a través dos teléfonos 609 829 292 ou 986 191 958.
Con respecto ao caso positivo por coronavirus detectado no centro residencial de Caldas, o alcalde sinala que mantén o contacto permanente tanto coa súa responsable como co persoal do centro de saúde e as autoridades sanitarias. Mantéñense os protocolos de vixilancia, control e illamento correspondentes para velar pola seguridade e saúde da poboación.
O alcalde recordou que, tras o positivo detectado, Protección Civil realizou unha desinfección nas inmediacións desta instalación e tamén do centro de saúde próximo e outras rúas da vila e zonas próximas a farmacias e comercios.
Relacionadas:
-
O BNG esixe "información e transparencia" sobre un accidente na planta química de FORESA en Caldas
Por Redacción |
-
A residencia de anciáns de Caldas rexistra o seu segundo positivo por coronavirus
Por Redacción |
-
Recambios Mourente doa 5.000 luvas ao Concello para axudar co desabastecemento de material
Por Sara Iglesias |
-
Caldas habilita un servizo de atención psicolóxica mentres dure a crise do coronavirus
Por Redacción |
-
Estudan evacuar a hoteis ou centros pechados a maiores en residencias que dean positivo por coronavirus
Por Alejandro Espiño |
-
O asilo de Caldas, en corentena tras un positivo por coronavirus
Por Alejandro Espiño |
-
Os concellos vixían o cumprimento do estado de alarma polo coronavirus
Por Oskar Viéitez |