Dous falecidos por coronavirus o mesmo día na área sanitaria, que suma cinco vítimas mortais
Por Natalia Puga
A área sanitaria de Pontevedra e O Salnés suma este xoves dous novos falecementos por coronavirus. Un home de 74 anos faleceu pola mañá e pola tarde contabilizouse a morte dun paciente de 81.
Con estes dous novos falecementos, o total de vítimas mortais que deixou o Covid-19 na área sanitaria ascende a cinco, o primeiro o sábado 14 de marzo e dous nesta luctuosa xornada do 26 de marzo.
En canto ao último falecido, trátase dun home de 81 anos que tiña patoloxías previas e permanecía, tras o seu diagnóstico por coronavirus, hospitalizado e illado no Hospital Quironsalud Miguel Domínguez de Pontevedra.
A cuarta vítima, dada a coñecer á primeira hora deste xoves, foi un home de 74 anos que se atopaba ingresado no Hospital Montecelo e que, igualmente, era un paciente con patoloxías previas ao coronavirus.
Ata o de agora, faleceron na área sanitaria de Pontevedra e O Salnés cinco homes, dous deles ingresado no Hospital Quironsalud Miguel Domínguez e os outros tres en Montecelo. Dous tiñan 81 anos, outros dous contabilizaban 74 e outro tiña 72.
Segundo a última actualización de datos da Consellería de Sanidade, na área sanitaria de Pontevedra e O Salnés contabilizáronse desde o inicio da incidencia sanitaria do coronavirus ata este xoves un total de 222 casos positivos, dos que 74 están ingresados, 64 hospitalizados en planta e 10 na UCI.
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
O Sergas ten a disposición da cidadanía unha páxina web (https://coronavirus.sergas.es), na que se pode consultar información dirixida á poboación, aos profesionais sanitarios e a outros colectivos.
Relacionadas:
-
Os casos activos de coronavirus na área sanitaria ascenden ata os 348
Por Diego Espiño |
-
A área sanitaria multiplica as altas por coronavirus, con 12 nas últimas 24 horas
Por Diego Espiño |
-
Día complicado na área sanitaria, con 38 novos casos activos por coronavirus nunha xornada
Por Natalia Puga |
-
Un home de 90 anos, sexta vítima mortal do coronavirus na área sanitaria
Por Natalia Puga |
-
A área sanitaria chega aos 222 positivos por coronavirus e rexistra un novo falecemento e un paciente de alta
Por Natalia Puga |
-
Un home de 74 anos, cuarto falecido por coronavirus na área sanitaria de Pontevedra
Por Natalia Puga |