O Galicia Palace, o Room e o Campaniola, declarados aloxamentos de servizo esencial
Por Alejandro Espiño
Dous hoteis da cidade de Pontevedra, o Galicia Palace e o Room, e o establecemento rural Campaniola, situado en Campañó, foron declarados polo Goberno como "servizos esenciais" entre os aloxamentos turísticos. Así o recolle o Boletín Oficial do Estado.
A expansión do coronavirus e a situación de alerta sanitaria obrigaron ao executivo de Pedro Sánchez a permitir a apertura de establecementos hostaleiros en toda España para permitir o aloxamento neles de traballadores de diversas actividades fundamentais.
Así, segundo sinala o BOE, entre outros poderán aloxarse neles traballadores dos sectores sanitario, alimentario, agricultura e pesca, portos, aeroportos e trens, subministración de enerxía, transporte de mercadorías ou forzas e corpos de seguridade.
O mantemento e a apertura ao público destes establecementos, engade o Goberno, deberá realizarse respectando as medidas e instrucións de protección indicadas polo Ministerio de Sanidade para evitar o contaxio do COVID-19.
Ademais destes tres establecementos en Pontevedra, decláranse esenciais dez hoteis máis na provincia, entre eles, un na Lanzada (O Grove) e outro en Armenteira (Meis).