Nove psicólogos da AECC ofrecerán terapia psicolóxica e desafogo emocional en Pontevedra
Por Alejandro Espiño
Nove profesionais da psicoloxía, experimentados colaboradores da Asociación Española Contra o Cancro (AECC), axudarán a atender o servizo de terapia psicolóxica e desafogo emocional que puxo en marcha o Concello de Pontevedra polo estado de alarma do coronavirus.
Este apoio psicolóxico pretende facer fronte aos altos niveis de angustia que a pandemia do COVID-19 e o confinamento poden xerar en moitas persoas, xa sexa porque están infectados polo coronavirus, porque teñen a algún familiar enfermo, porque perderon a algún membro da familia por mor deste virus ou ben porque son coidadores de persoas maiores.
Os dous teléfonos activados dende o inicio do estado de alarma para atender ás persoas maiores e con mobilidade reducida que viven soas (986 85 03 98 e 986 84 83 34) serán os que canalicen estas chamadas e, posteriormente, vanse a derivar a estes psicólogos os casos nos que estimen necesaria a súa axuda.
Esta terapia psicolóxica e de desafogo emocional permite, segundo a edil de Benestar Social, Paloma Castro, atender ás necesidades da poboación máis vulnerable ante una situación que "non resulta psicoloxicamente sinxela de afrontar para ninguén".
A situación actual é, engadiu a concelleira socialista, "especialmente difícil " para os que atravesan loitos, os que padecen enfermidades crónicas e teñen medo ao contaxio e as coidadoras de persoas maiores, que temen contaxiar ou seren contaxiados.
Os psicólogos da AECC teñen, recorda Castro, unha "ampla experiencia" para tratar este tipo de situacións de ansiedade e estrés e que, ademais, no caso de Pontevedra, conta cun dos mellores equipos de atención psicosocial para atender pacientes de cancro e ás súas familias.
Esta colaboración súmase ao traballo de psicólogos, traballadores sociais e coordinadores de voluntariado da asociación contra o cancro de Pontevedra que, desde o primeiro día, atenden as demandas de doentes de cancro e das súas familias a través do teléfono gratuíto Infocáncer as 24 horas (900 10 00 36) e doutras canles remotas.
Ademais de atender dende as súas casas mediante videoconsultas, prestan asistencia aos casos de emerxencia que non se poden realizar por outros medios (como o préstamo de camas articuladas, cadeiras, andadores, grúas ou vales de alimentos), respectando sempre as recomendacións e obrigas emitidas polas autoridades sanitarias.
Nestes momentos, os 24 voluntarios de misión da AECC de Pontevedra, que é o que mantén un contacto máis directo con pacientes e que viña desempeñando a súa actividade en hospitais e domicilios, está a formar tándem co equipo de psicólogos, conseguindo ofrecer un elevado nivel de cobertura ás persoas que soliciten este servizo.
Relacionadas:
-
A Asociación contra o cancro reabre a súa sede en Pontevedra
Por Redacción |
-
Os psicólogos do Concello de Pontevedra fan un seguimento a 2.000 maiores que viven sós
Por Redacción |
-
A AECC de Pontevedra supera as 1.500 intervencións desde o inicio da corentena
Por Redacción |
-
O psicólogo deportivo Iago Roel resolve dúbidas sobre a corentena expostas por deportistas de elite de Pontevedra
Por Manu Otero | Creada e actualizada
-
Así levan o confinamento catro mulleres activas
Por Marisa Ciordia |
-
Meniños e Secretariado Xitano colaboran co Concello para asegurar o acceso á educación das familias máis vulnerables
Por Redacción |
-
Estas son as preguntas máis frecuentes recollidas no 012
Por Redacción |
-
A AECC toma a vía telemática para axudar os pacientes durante a crise do coronavirus
Por Sara Iglesias |
-
A Asociación contra o Cancro axuda a resolver entre os seus beneficiarios as dúbidas en relación co COVID-19
Por Redacción |